«Еўраначос» з Вольгай Карач. Кадр з шоу
Першапачаткова на ютуб-канале «Еўраначос» публікаваліся відэа ў выглядзе сатырычных рэпартажаў з варшаўскіх вуліц ці альтэрнатыўных выпускаў навін на каларытнай трасянцы.
Смела размаляваная Яленаўна (якую Ляўчук таленавіта выконвае) з высокім начосам, масіўнымі чырвонымі каралямі і не менш вялікім чырвоным мікрафонам выглядае класічнай ліхадзейкай з дыснееўскіх мультфільмаў. У варожым стане, дзе ёй давялося працаваць, яна паводзіць сябе адпаведна вобразу дзёрзка і агрэсіўна, куды актыўней за сапраўдных беларускіх прапагандыстаў — млявых і безыдэйных.
Танковіча прымусілі пераабуцца. Кадр з шоу
Але за апошні час «Еўраначос» пачаў пераходзіць у незвычайны фармат трэш-ток-шоу. Ролікі досыць кароткія, але і гэтых хвілін дастаткова, каб перажыць складаныя пачуцці ад таго, што адбываецца на экране.
У канцы лістапада выйшаў першы выпуск у такім фармаце, госцем якога стаў калега Яленаўны, комік Дзмітрый Танковіч, які на ютуб-канале Nexta Live вёў сатырычную праграму «А я сейчас вам покажу». Танковічу, які раней працаваў на беларускім тэлебачанні, а пасля з’ехаў ва Украіну, Яленаўна прапанавала пераабуцца ў смешны драўляны абутак, маўляў, «давай, табе ж не ўпершыню».
На Сахашчыка Яленаўна спрабуе начапіць шапку з рогамі, але той адмаўляецца. Кадр з шоу
Наступныя два госці былі куды больш нечаканымі — актывістка Вольга Карач і прадстаўнік Аб'яднанага пераходнага кабінета па абароне і нацыянальнай бяспецы Валерый Сахашчык. Пытанні, заявы і паводзіны вядоўцы сталі больш вострымі і правакацыйнымі.
У Сахашчыка Яленаўна пыталася, да прыкладу, ці паўсюль у яго гэтак жа гладка, як на лысай галаве, і як сітуацыя з «арэшкамі», у Карач — ці стаяла яна на трасе.
Яленаўна з крыкамі «Пацук! Пацук!» збягае са студыі, пакідаючы Карач адну. Кадр з шоу
Фінал ток-шоу з Вольгай Карач не можа пакінуць абыякавым: Яленаўна з крыкамі «Пацук! Пацук!» вылятае са здымачнай студыі, а камера факусіруецца на актывістцы, якая некалькі хвілін сядзіць адна ў абсалютнай цішыні і не ведае, як рэагаваць.
У гэты момант немагчыма не паспачуваць Карач.
Галоўнае пачуццё, якое пакідае шоу — адчуванне іспанскага сораму, ці, як цяпер кажуць, крынжу. І менавіта на гэтае пачуцце і скіраваны такія шоу.
Пад канец шоу, якое абмяркоўваліся яшчэ доўга, Саша Борціч адвесіла вядоўцу аплявуху. Кадр з «Опять не Гальцев»
Найбольш блізкі аналаг — гэта расійскае забаўляльнае шоу «Опять не Гальцев», якое выходзіць на ютуб-канале «Плюшки». Канал быў заснаваны ў 2020 годзе былымі ўдзельнікамі каманды КВЗ «Плюшки имени Ярослава Мудрого». Вядоўца шоу, стэндапер Багдан Лісеўскі, з сур’ёзным выразам твару задае нязручныя і недарэчныя пытанні расійскім акцёрам, комікам, вядоўцам і спартсменам. Сярод гасцей былі і «экстрасэнс» Улад Кадоні, і «зводніца» Роза Сябітава і актрыса Саша Борціч.
Абсурднасць і правакацыйнасць пытанняў нярэдка даводзіць гасцей, якія спачатку спрабуюць захоўваць спакой і быццам не разумеюць, што ўвогуле адбываецца. Зрывы гасцей многія лічаць пастановачнай часткай шоу.
Галіфіянакіс бесіць усіх гасцей, або ўсе робяць выгляд, што бесіць. Кадр з шоу
Абодва шоу, расійскае і беларускае, бяруць пачатак ад амерыканскага шоу «Паміж двума папарацямі з Закам Галіфіянакісам» (Between Two Ferns with Zach Galifianakis), якое нерэгулярна выходзіла з 2008 па 2018 гады. У кароткіх роліках да 6 хвілін — больш, відаць, цяжка вытрымаць усім удзельнікам працэсу — з’яўляліся зоркі першай велічыні: Наталі Портман, Брэдлі Купер, Брус Уіліс, Эн Хэтэўэй, Джасцін Бібер, Брэд Піт і многія іншыя.
Сцэнічны вобраз Галіфіянакіса, змрочнага і панурага «адмарозка», такім, які ён і прадстае перад гледачамі ў серыі фільмаў «Хлапечнік у Вегасе», дапаўняе абразлівыя і прыніжальныя пытанні, якія ён задае сваім гасцям.
Не пашкадаваў Галіфіянакіс нават прэзідэнта Барака Абаму і кандыдатку ў прэзідэнты Хілары Клінтан, закідаючы ім непаліткарэтныя пытанні, напрыклад, як гэта быць «апошнім чорным прэзідэнтам», або ўстаўляючы пасярод выпуску «аплачаную» рэкламу з Дональдам Трампам, канкурэнтам Хілары на выбарах.
Філамена Канк задае непрыстойнае пытанне навукоўцу, карыстаючыся сугуччам слоў з назвай замка Камелот. Кадр з шоу
Да гэта ж жанру можна прылічыць і брытанскія псеўдадакументальныя праекты, у якіх комік пад псеўданімам Філамена Канк са спакойным тварам тлумачыць з'явы самым прамым і тупым чынам або задае спецыялістам такія недарэчныя і грубыя пытанні, што тыя літаральна нямеюць.
Расійскае і заходнія шоу ў гэтым фармаце нечакана аказаліся надзвычай паспяховымі. А што з беларускім?
Выпускі з Яленаўнай, пераймаючы асноўную канцэпцыю гэтых шоу, усё ж трохі адрозніваюцца. Па-першае, вядоўца тут не імітуе сур'ёзнасць, а задае пытанні ў карыкатурным вобразе.
Хілары Клінтан заявіла, што пашкадавала, што прыйшла на шоу «Паміж двума папарацямі з Закам Галіфіянакісам». Кадр з шоу
Па-другое, выбар гасцей для шоу адрозніваецца. Лісеўскі і Галіфіянакіс пачыналі з зорак шоу-бізнэсу, якія разумелі што, навошта і як мусіць адбывацца ў кадры і маглі падыграць вядоўцу, закаціўшы істэрыку ці паказваючы сваё раздражненне ды пагарду.
Яленаўна пачала з больш-менш вядомых палітычных фігур, якія, відаць, не ўяўлялі, куды патрапяць і як ім рэагаваць на паводзіны вядоўцы.
Нават Абама і Хілары, якія прыйшлі на шоу, каб, відавочна, прыцягнуць да сваёй партыі дадатковую аўдыторыю, пачуваліся вельмі стрымана і няёмка — і гэта была не ігра.
Што тады казаць пра беларускіх палітыкаў, які не звыкліся з тым, што могуць быць высмеяныя ці пастаўленыя ў няёмкую сітуацыю.
«Наша Нiва» — крыніца якаснай інфармацыі і бастыён беларушчыны
ПАДТРЫМАЦЬ «НН»Чытайце таксама:
Маргарыта Ляўчук едзе з канцэртамі на фронт
АНТ даганяе «Белсат» — анансавалі свой першы серыял «Начная змена»
Польшча для палякаў… і ліцвінаў! Выйшаў сатырычны серыял пра шляхту
