Начальнік упраўлення ў справе супрацьдзеяння кіберзлачыннасці Берасцейскага УУС Андрэй Глінскі. Фота СК
Журналісты-расследавальнікі выявілі, што на Берасцейшчыне пасля 2020 года пры розных абставінах памерлі не менш за пяць высокапастаўленых афіцэраў. Хоць афіцыйна не паведамлялася пра гэтыя смерці, інфармацыя пра дзве з пяці ўсё ж прасачылася ў СМІ.
Першым пайшоў з жыцця палкоўнік у запасе Генадзь Вайтовіч: 19 траўня 2021 года ў лесапаласе пры дарозе ў Берасцейскім раёне яго знайшлі павешаным. Вайтовіч выйшаў на пенсію ў канцы 2020-га з пасады начальніка ўпраўлення аховы правапарадку УУС Берасцейскага аблвыканкама. На пенсіі жыў у прадмесці Берасця з жонкай і сынам, які таксама быў супрацоўнікам МУС. Спіртнымі напоямі Вайтовіч не злоўжываў, намераў скончыць жыццё самагубствам не выказваў.
Упраўленне, якім камандаваў Вайтовіч перад выхадам на пенсію, у 2020 годзе каардынавала працу ўсёй берасцейскай міліцыі ў здушэнні пратэстаў і наўпрост справаздачылася перад МУС.
Другая смерць здарылася ў Баранавічах. Улетку 2022 года пры купанні скокнуў у ваду, зламаў шыю і пазней памёр у шпіталі начальнік аддзела аховы правапарадку Баранавіцкага ГАУС, падпалкоўнік міліцыі Аляксей Гецьман. Ён вядомы тым, што лжыва сведчыў у судах, фабрыкаваў адміністрацыйныя і крымінальныя справы супраць гараджан.
Наступны памерлы — падпалкоўнік упраўлення ГУУБ МУС па Берасцейскай вобласці, якое спецыялізуецца на пошуку беларусаў, што пакідаюць у сеціве каментары пра сілавікоў.
19 снежня 2020-га ў сваёй кватэры памёр 43-гадовы старшы оперупаўнаважаны ў асоба важных справах упраўлення ГУУБ МУС падпалкоўнік Р. Леванюк.
Уначы 15 траўня 2021 года ў Берасцейскую больніцу хуткай медычнай дапамогі ў стане комы, выкліканай алкагольнай інтаксікацыяй, чэрапна-мазгавою траўмай, страсеннем галаўнога мозгу даставілі былога начальніка АБЭЗ, які атрымаў павышэнне ў службе на пасаду старшага оперупаўнаважанага ў асоба важных справах УБЭЗ УУС Берасцейскага аблвыканкама, падпалкоўніка міліцыі У. Пытлякова. З дапамогаю медычнай ініцыятывы «Белыя халаты» ўдалося даведацца, што высокапастаўлены ўбэпавец памёр.
Апошняй у шэрагу смерцяў супрацоўнікаў у палкоўніцкіх званнях сталася нядаўняя вестка пра раптоўную смерць згаданага ў пачатку артыкула 44-гадовага начальніка ўпраўлення ў справе супрацьдзеяння кіберзлачыннасці, палкоўніка Глінскага. На пасаду яго прызначылі ўлетку 2022-га. Улічваючы век і званне, ён зрабіў галавакружную кар’еру.
Чытайце таксама:
Праслухоўка і «хабар» ад КДБ. Стала вядома, як судзілі экс-кіраўніка аховы Лукашэнкі
Стала вядома пра смерць яшчэ аднаго высокапастаўленага сілавіка
У 2020 годзе адразу некалькі высокапастаўленых сілавікоў траплялі ў ДТЗ. Была і чалавечая ахвяра
