Трэба выхоўваць маладых людзей так, каб у душы назаўжды зацвердзіліся ідэалы любові да бліжняга, вернасці, так выказаўся мітрапаліт Мінскі і Заслаўскі Веніямін на сустрэчы Аляксандра Лукашэнкі з Сінодам Беларускай Праваслаўнай Царквы, піша БелТА.
Ён таксама закрануў тэму патрыятызму: «перад дзяржавай і царквой стаіць няпростая задача — выхаваць маладога чалавека так, каб у яго душы назаўжды зацвердзіліся ідэалы любові да бліжняга, вернасці, адданасці, ахвярнасці. Такі падыход, несумненна, прынясе нам плён, дазволіць выхаваць сапраўдную, бескарыслівую любоў да Радзімы».
«І гэта ў корані адрозніваецца ад таго патрыятызму, які прапагандуюць дзеячы нацыяналістычнага толку», — заўважыў мітрапаліт Веніямін.
Паведамляецца, што ў апошнія гады БПЦ актывізавала ўзаемадзеянне з Мінадукацыі, Узброенымі сіламі ў «справе духоўна-маральнага і патрыятычнага выхавання».
Пры гэтым Веніямін звярнуў увагу: «калі гэтая дзейнасць не будзе цесна ўвязана са сферай культуры і СМІ, то будзе вельмі цяжка адстаяць нашу моладзь. Бо часта дзеці, асабліва ў падлеткавым узросце, знаходзяць прыклады для пераймання не ў сям'і ці школе, а сярод герояў тыктоку або куміраў масавай культуры. На жаль, гэта дадзенасць эпохі інфармацыйных тэхналогій».
«Культура прапануе нам мастацкія вобразы, дае праз іх эмацыйную ацэнку-станоўчую або негатыўную — розных падзей у жыцці людзей, — мяркуе ён. — У тым ліку правілах паводзін, традыцыям. Бо эмоцыі мацней за ўсё ўздзейнічаюць на дзіцячыя розумы, моладзь. Таму складана дамагчыся поспеху ў зацвярджэнні традыцыйных каштоўнасцяў, калі культура не скажа сваё важкае слова ў іх падтрымку. Тут усё мае значэнне — і тыя вобразы, якія прапануе моладзі сучасная мода, і творчыя праекты, прадстаўленыя на сцэне або экранах тэлевізараў».
«Асаблівай увагі патрабуе інтэрнэт з яго ўнікальнымі магчымасцямі, які ў гульнявой, прывабнай форме прапагандуе сярод дзяцей і моладзі як пазітыўныя, так і негатыўныя ўзоры паводзін», — адзначыў іерарх.
«Прыкладам сённяшняга дня з'яўляюцца спробы адраджэння паганства, якое, як правіла, актывізуецца ў перыяды нявызначанасці, няўпэўненасці ў будучыні.
І здольнае хутка ператварыцца з бяскрыўднага баўлення часу ў псеўдарэлігійны рух са стварэннем арганізаваных і нават ваенізаваных структур, — мяркуе ён. — Падобнае мы ўжо назіраем у суседніх краінах. Таму так важна прапанаваць моладзі добрыя прыклады, вырасціць сваіх яркіх, прывабных і нашых па духу моладзевых лідараў».
На думку мітрапаліта Веніяміна, значным крокам для гэтага стала б вызначэнне маральных крытэрыяў у стварэнні тэлевізійных праграм, правядзенні масавых мерапрыемстваў, асабліва для дзяцей і моладзі.
«Тут ёсць над чым нам папрацаваць сумесна з Міністэрствамі адукацыі і культуры», — заўважыў ён.
«Пазітыўную ролю заклікана адыграць і грамадская рада па маральнасці, якая нядаўна аднавіў сваю дзейнасць па ініцыятыве БПЦ і праўладнага Саюза пісьменнікаў Беларусі. Хацелася б, каб яе больш актыўна падтрымалі дзяржорганы», — сказаў кіраўнік БПЦ.
Ён звярнуў увагу, што за апошнія гады ўзаемадзеянне дзяржавы, царквы і грамадства істотна пашырылася, і запэўніў, што БПЦ і ў далейшым будзе прыкладаць намаганні для ўмацавання «духоўнасці» ў грамадстве.
Чытайце таксама:
Работніка кафедральнага касцёла Уладзіслава Беладзеда прысудзілі да трох гадоў калоніі
Мітрапаліт Веніямін узнагародзіў царкоўным ордэнам Івана Кубракова
