Пра гэта кандыдат у прэзідэнты заявіў падчас сустрэчы з выбарцамі ў Магілёве.
«Свае перспектывы я ацэньваю як дастаткова добрыя, — сказаў Міхалевіч. — Я ўпэўнены, што пры справядлівым і сапраўдным падліку галасоў, у мяне ёсць шансы выйсці ў другі тур.
Я атрымаю больш за 10% галасоў, гэта дакладна. І гэтага будзе дастаткова, каб пры такой колькасці кандыдатаў выйсці ў другі тур».
Паводле слоў палітыка, яму ўдаецца зрабіць шмат з таго, што ён плануе. Ніякіх сур’ёзных перашкод з боку ўладаў ён не адзначае.
Падчас сустрэч з выбаршчыкамі, як сцвярджае Міхалевіч, яму бачна, што людзей у большай ступені непакоіць эканамічная сітуацыя і «пагаршэнне ўзроўню жыцця».
Што да ўзаемаадносінаў і ўзаемадзеяння з іншымі апазіцыйнымі кандыдатамі, то, паводле слоў Міхалевіча, ён з імі практычна не бачыцца.
«Кожны вядзе сваю кампанію, — адзначае палітык. — Мы не крытыкуем адзін аднаго, і гэта вялікі плюс».
Падчас сустрэчы з магіляўчанамі, якая адбылася ў СШ № 21, Міхалевіч заявіў, што пазіцыянуе сябе як кандыдата, незалежнага як ад улады, так і ад апазіцыі. Паводле сцвярджэння палітыка, калі ён не выйдзе ў магчымы другі тур выбараў, то, хутчэй за ўсё, не падтрымае нікога.
