У Мінску адбылося першае пасяджэнне Каардынацыйнай рады, на якім была прынятая рэзалюцыя. Рада паспрабавала ўсталяваць кантакт з Адміністрацыяй прэзідэнта, але пакуль адказу не было, піша Tut.by
На пасяджэнні быў абраны прэзідыум Рады, у які ўвайшлі Святлана Алексіевіч, Лілія Уласава, Сяргей Дылеўскі, Максім Знак, Вольга Кавалькова, Марыя Калеснікава, Павел Латушка. Рада прыняла рэзалюцыю, у якой патрабуе спыніць гвалт, вызваліць палітвязняў, прызнаць выбары несапраўднымі.
Як заявіў Павел Латушка, яны ўжо тэлефанавалі ў Адміністрацыю прэзідэнта, каб паведаміць пра мэты і задачы Рады.
— Сёння ў нас была першая спроба ўсталяваць тэлефонны кантакт з высокімі прадстаўнікамі Адміністрацыі прэзідэнта, каб праінфармаваць аб рэальных мэтах і задачах, якія ставіць перад сабой Каардынацыйная рада, чым тыя, якія агучваюцца ў дзяржСМІ. Пакуль адказу не было, - распавёў Павал Латушка.
Экс-дырэктар Купалаўскага тэатра адзначыў, што Рада бачыла рэакцыю Еўрасаюза і Расіі на выбары ў Беларусі. Але, як лічыць Латушка, ідэальным варыянтам будзе, калі перамовы па транзіце ўлады будуць праходзіць без умяшання вонкавых сіл, а толькі паміж грамадствам і ўладай Беларусі.
— Мы, вядома, заўважылі рэакцыю Еўрасаюза, якая сёння была агучана праз кіраўнікоў краін ЕС і кіраўніка МЗС РФ. Галоўнае — непрызнанне выбараў, увядзенне санкцый. Рэакцыю Расіі, якую агучыў міністр замежных спраў, які сказаў, што выбары прайшлі неідэальна, мы таксама заўважылі. Менавіта расійскі бок заклікаў нас [з беларускай уладай] да дыялогу. Мы не аднойчы гэта падкрэслівалі, мы не раз прапаноўвалі такі дыялог [з беларускай уладай]. Што тычыцца наогул сённяшняй праблемы, мы лічым, што яна павінна быць вырашаная ўнутры Беларусі, мы павінны самастойна вырашаць свой лёс. Калі перамовы будуць праходзіць па лініі грамадства — улада — гэта самы ідэальны варыянт, - заявіў Павел Латушка.
Варыянт, калі ўлады не пойдуць на дыялог, у Радзе дапускаюць, але чакаюць, што афіцыйны Мінск усё ж пагодзіцца на дыялог для вырашэння палітычнага крызісу ў краіне. Сябры Каардынацыйнай рады таксама яшчэ раз падкрэслілі, што ніякай праграмы, пра якую пішуць некаторыя СМІ, у Рады няма.
Марыя Калеснікава адзначыла, што Рада не ставіць сваёй мэтай змяненне канстытуцыйнага ладу і знешнепалітычнага курсу і падтрымлівае людзей, якія выказваюць сваё меркаванне, выходзячы на мірныя акцыі пратэсту.
— У тым ліку мы падтрымліваем ініцыятывы, якія створаны для падтрымкі тых людзей, да якіх прымяняюцца санкцыі. Мы будзем расследаваць гэтыя факты, — заявіла Марыя Калеснікава.
