Французскія манахі апынуліся ў каранціне з трыма тонамі сыру, але знайшлі выйсце
Манастыр у цэнтры французскага рэгіёна Бургундыя запусціў тэрміновы анлайн-продаж тысяч сыроў ручной працы, вырабленых манахамі.
Фота Depositphotos.com
Абацтва Сіто каля горада Дыжон звычайна прадае сыры толькі ў рэстараны або наведнікам крамы на ўласнай тэрыторыі. Але пандэмія кавіду закрыла рэстараны, і ад гэтага ў склепах манастыра цяпер завіслі 4 тысячы сыроў агульнай вагой 2,8 тоны.
Брат Жан-Клод, кіраўнік маркетынгу ў манастыры, сцвярджае, што аб’ём продажу сыроў знізіўся прыкладна ў два разы, і манахам трэба вычысціць склады. Пытанне варта вырашыць на фоне таго, што французскія рэстараны зачыненыя яшчэ з 30 кастрычніка, тлумачыць The Guardian.
Манахі звярнуліся да інтэрнэт-стартапа Divine Box, які прадае вырабленыя ў абацтвах прадукты. Іх мэтай было прадаць да аўторка як мінімум тону сыроў, але ўжо зроблена замоў на дзве тоны.
Сыры з абацтва ўзялі срэбраны медаль на леташняй выставе ежы і напояў у Ліёне — бастыёне французскай кулінарнай культуры.
