Што адбываецца ў Казахстане? Сітуацыя на раніцу 6 студзеня
Наступіў новы дзень пратэстаў і беспарадкаў у Казахстане. У сераду прэзідэнт Такаеў запрасіў дапамогу ў сіл АДКБ у навядзенні парадку. Якія навіны па стане на раніцу 6 студзеня?
У краіне часова прыпыненая дзейнасць усіх фінансавых устаноў, пра гэта заявіў прэс-сакратар Нацбанка Алжас Рамазанаў. Такое рашэнне прынятае з-за парушэнняў у працы інтэрнэту і ў мэтах бяспекі супрацоўнікаў. Людзі стаяць у чэргах да банкаматаў, каб зняць грошы.
У Нур-Султане ўсе адміністрацыйныя будынкі ўзятыя пад ахову і ачэпленыя сілавікамі. Абстаноўка ў сталіцы спакойная.
У Алматы адбываецца антытэрарыстычная аперацыя. Вайскоўцы на БТР і аўтатранспарце ўзялі ў кальцо сотні людзей на цэнтральнай плошчы. Там ідзе перастрэлка.
Кіраўнік камітэта расійскай Дзярждумы па СНД Калашнікаў заявіў, што сілы АДКБ нібыта не будуць наводзіць парадак у краіне, а іх роля будзе заключацца ў ахове вайсковай інфраструктуры і іншых аб’ектаў. З «тэрарыстамі» будуць разбірацца мясцовыя сілавікі.
