«Беларусбанк» спыніў праводзіць пераводы фізічных асоб у далярах і некаторых іншых валютах
«Беларусбанк» прыпыніў для кліентаў — фізічных асоб магчымасць адпраўляць і атрымліваць пераводы ў далярах. Абмежаванне тычыцца таксама некаторых іншых валют, а таксама грашовых адпраўленняў ва Украіну, паведамляе «Зеркало».
«Беларусбанк» часова не ажыццяўляе міжнародныя пераводы фізічных асоб у далярах ЗША», — паведамілі ў кантакт-цэнтры банка. Пры гэтым у фінустанове не змаглі ўдакладніць магчымыя тэрміны аднаўлення працы з пераводамі ў далярах.
Таксама банк не праводзіць міжнародныя пераводы ў канадскіх далярах, дацкіх і нарвежскіх кронах, грыўнях, фунтах стэрлінгаў, швейцарскіх франках. «Акрамя таго, не ажыццяўляюцца міжнародныя банкаўскія пераводы ва Украіну», — гаворыцца на сайце банка.
З якой даты адмянілі пераводы ў гэтых валютах, у кантакт-цэнтры банка не змаглі паведаміць, але ўдакладнілі, што «прадстаўленая вышэй інфармацыя размешчаная банкам сёння».
