У Крыме жанчыне давялося выбачацца за песню Сярдзючкі на дыскатэцы
Некалькі дзён таму з'явілася відэа, на якім людзі танцуюць у Ялце пад украінскую песню «Ой, смереко» і пад «Гуляначку» Веркі Сярдзючкі. Гэта выклікала шквал абурэння сярод расіян у сеціве.
У выніку 14 лістапада з'явіўся запіс, на якім жанчына плача і просіць прабачэння за тое, што ўключыла ўкраінскую песню.
«Дарагія расіяне, сыны нашай радзімы, даруйце мне. Я вас усіх люблю. Гэтая песня прагучала… Я нават не спецыяльна яе паставіла. Я хацела парадаваць людзей дыскатэкай. Даруйце мне. Я вас усіх люблю. Нашым сынам хуткай перамогі і вяртання дадому. Мы пераможам. Я за Расію, я люблю вас усіх. Даруйце мне», — кажа жанчына.
У акупацыйнай адміністрацыі Ялты заявілі, што ў горадзе «ніхто не душыць мовы».
«Ёсць, вядома, пытанне да рэпертуару — наколькі дарэчная сярдзючкіна «щеневмерла» і танцы пад яе (няхай застанецца на сумленні тых, каму было весела)», — заявіла кіраўніца горада Яніна Паўленка.
Яна назвала танцы на вуліцы «стыхійным канцэртам», рэпертуар якога не ўзгаднілі з «адміністрацыяй». «У абставінах разбяруцца праваахоўнікі, сумневаў у тым няма», — напісала Паўленка.
