Брытанская разведка: Расія рыхтуе абарончыя рубяжы за дзясяткі кіламетраў ад цяперашняй лініі фронту
Вайсковая разведка Мінабароны Вялікабрытаніі ў сваёй ранішняй зводцы ўказвае на тое, што прыярытэтам расійскіх вайскоўцаў у акупаваных частках Украіны застаецца падрыхтоўка абарончых рубяжоў — і не толькі ў Херсонскай вобласці.
«Лінія Вагнера»
Пасля адступлення з правага берага Дняпра расійскія вайскоўцы працягваюць надаваць прыярытэтную ўвагу пераабсталяванню, рэарганізацыі і падрыхтоўцы абароны на большасці ўчасткаў ва Украіне, канстатуюць аўтары зводкі.
Расійскія вайскоўцы абсталявалі новыя сістэмы траншэй ля мяжы з Крымам, а таксама ля ракі Паўночны Данец паміж Данецкай і Луганскай абласцямі.
Некаторыя з гэтых месцаў знаходзяцца на адлегласці да 60 км ад цяперашняй лініі фронту, што дазваляе выказаць здагадку, што расійскія вайскоўцы рыхтуюцца на выпадак далейшых буйных прарываў украінскіх войскаў, гаворыцца ў справаздачы.
Пры гэтым у брытанскай разведцы не выключаюць, што Расія паспрабуе перакінуць частку сіл, выведзеных з Херсона, для пашырэння сваіх наступальных аперацый у раёне горада Бахмут у Данецкай вобласці.