Міністр фінансаў Нямеччыны: Мы больш не залежым ад расійскіх энерганосьбітаў
Германія больш не залежыць ад расійскага імпарту энерганосьбітаў, заявіў у інтэрв'ю Бі-бі-сі міністр фінансаў краіны Крысціян Лінднер.
Фота: Dmitry Lovetski / AP
Паводле слоў Лінднера, Германія цалкам дыверсіфікавала сваю энергетычную інфраструктуру пасля расійскага ўварвання ў Украіну.
Берлін знайшоў новыя крыніцы імпарту энерганосьбітаў, нягледзячы на тое, што Расія перакрыла газавыя краны ў Еўропу, сказаў Лінднер.
«Так, вядома, Нямеччына па-ранейшаму залежыць ад імпарту энерганосьбітаў, але сёння ўжо не ад імпарту з Расіі, а ад сусветных рынкаў», — сказаў ён.
Раней Германія імпартавала з Расіі каля паловы спажыванага газу і больш за трэць усёй нафты. Расія спыніла пастаўкі газу ў краіну ў жніўні, а Нямеччына спыніла імпарт расійскай нафты ў пачатку гэтага года.
У пагоні за альтэрнатыўнымі крыніцамі энергіі краіна зноў адкрыла вугальныя электрастанцыі, адклала планы па закрыцці трох пакінутых у Германіі атамных электрастанцый і павялічыла магутнасці для захоўвання прыроднага газу, імпартаванага з іншых краін, такіх як Нарвегія і ЗША.
Лінднер, які прымае ўдзел у Сусветным эканамічным форуме, што праходзіць у Давосе, звярнуў увагу на хуткасць, з якой у Германіі быў пабудаваны новы тэрмінал для звадкаванага прыроднага газу — прыкладна за восем месяцаў, па яго словах.
Міністр фінансаў Нямеччыны дадаў, што запланаваныя дадатковыя інвестыцыі ў інфраструктуру. «Гэта толькі адзін прыклад велізарных перамен у палітыцы Нямеччыны», — сказаў ён.
