Яшчэ адна партыя падае дакументы на перарэгістрацыю без персанальных звестак
Старшыня Беларускай партыі левых «Справядлівы свет» расказаў «Народнай Волі», што дакументы на перарэгістрацыю партыі збіраецца падаваць 2 чэрвеня.
Старшыня партыі «Справядлівы свет» Сяргей Калякін
— Мы правялі з'езд, і ў пятніцу маем намер адправіць дакументы ў Мінюст, — сказаў Сяргей Іванавіч. — Апошні тэрмін — 2 чэрвеня, таму мы не спяшаемся, час ёсць. Мы падрыхтавалі пратакол нашага нядаўняга з'езда — яго таксама трэба прыкладаць, іншыя дакументы і ў пятніцу ўсе адправім па пошце.
Сяргей Калякін заявіў, што персанальныя звесткі не выдаюцца.
«Дзяржава, калі запытвае ў вас персанальныя даныя, лічыць, што з'яўляецца як бы аператарам і не падпадае пад устаноўленыя ёй жа правілы. Хоць ёсць норма, што персанальныя даныя можна распаўсюджваць і апрацоўваць толькі са згоды самога чалавека. Не ўсе сябры нашай партыі хочуць, каб Мінюст ведаў іх адрас, месца працы, тэлефоны… Наогул, я лічу, што ўлада з перарэгістрацыяй палітычных партый робіць вялікую дурасць, наступствы якой выявяцца праз некаторы час…» — тлумачыць палітык.
Дакументы на рэгістрацыю падала наваспечаная партыя «Белая Русь», праўладная Камуністычная партыя. Учора беларуская партыя «Зялёныя» заявіла, што падае дакументы на перарэгістрацыю таксама без персанальных звестак.
