Чым займаецца экс-вядучая АНТ Вольга Сулімава, якая пераехала з сям'ёй у Лондан?
Вольга Сулімава (да замужжа — Курышка) пачынала кар’еру на Беларусь-1, а потым працягнула працу вядучай на АНТ. Яшчэ ў Беларусі паралельна з працай на тэлебачанні Вольга пачала выкладаць курсы аратарскага майстэрства (у прыватнасці, у школе свайго мужа «Лідар»), а цяпер перабралася з сям'ёй у Лондан і пераключылася на настаўніцтва цалкам.
Вольга Сулімава. Фота з сацыяльных сетак
Сулімава — прафесійная вядоўца: яна скончыла Вышэйшую нацыянальную школу тэлебачання і радыё ў Маскве па спецыяльнасці «Вядоўца тэлепраграм».
За перыяд больш чым 15-гадовага тэлевізійнага стажу было месца не толькі прамым эфірам і навінам, але і каля 100 інтэрв’ю (найбольш сама Вольга ганарыцца такімі суразмоўцамі, як Ірына Хакамада, Уладзімір Познер, Іван Ахлабысцін, Аляксандр Машэнскі, Грыгорый Лепс).
Вядучая з Іванам Ахлабысціным. Фота: фэйсбук
Гледачы могуць яе памятаць таксама па шоу — напрыклад, па «Зорных танцах» ці конкурсах прыгажосці. Дарэчы, сама Вольга ганараваная тытулам «Міс Мінск 2004» і «Віцэ-міс Беларусь».
Адзін з яе апошніх працяглых аўтарскіх праектаў на АНТ — «Суботні выпуск». У адным з іх, напрыклад, Вольга хвалілася папулярнасцю відэа калег пра «абасраных кароваў». Ролік наведвання Лукашэнкам аграхолдынгу «Купалаўскае» ў Шклоўскім раёне ў 2019-м сапраўды разляцеўся па сеціве і парадзіў шмат мемаў. Асабліва каментар: «Ты паглядзі на гэтую скаціну, яна ж уся абасраная!»
У пачатку 2020 года Сулімава паспела атрымаць падзяку з рук Лукашэнкі за «высокі прафесіяналізм, значны асабісты ўнёсак у развіццё дзяржаўнай інфармацыйнай палітыкі». Што канкрэтна стаіць за гэтай узнагародай? Напрыклад, шматлікія паездкі ў рэгіёны і кампліментарныя сюжэты адтуль. Трансляванне пазітыву (86% беларусаў ганарацца сваёй краінай, «Беларусь у чацвёрцы экспарцёраў сыру і тварагу», «не трэба панікаваць падчас кавіду») і ўсіх целарухаў Лукашэнкі ў Палацы незалежнасці (і не толькі), ухваленне датэрміновага галасавання.
Фота з сацыяльных сетак
За дзень да выбараў-2020 Вольга пытала з экранаў: «Зруйнаваць дзеля прывідных абяцанняў? А што наўзамен гатовыя прапанаваць тыя, хто гэтыя абяцанні раздае?» — маючы на ўвазе апазіцыю.
Спецыяльны рэпартаж гэтага выпуску пад назвай «На цёмным баку» быў прысвечаны руху «Краіна для жыцця». «У каробках — лістоўкі і металічныя прадметы, падобныя на супрацьтанкавыя вожыкі», — пужаў закадравы голас у сюжэце, дэманструючы кадры аператыўнай здымкі, намякаючы, што прадстаўнікі аб'яднаных штабаў рыхтаваліся ўзброіць беларусаў да «так званых мірных пратэстаў».
Але неўзабаве сям’я ўсім складам пераехала на Балі. Пасля трох год жыцця там Сулімавы распачалі чарговы новы этап: восенню 2023-га года іх дзеці пайшлі ў школу Лондана. Муж Вольгі Сяргей змог пераехаць туды па візе талентаў.
Сям'я Сулімавых у Лондане. Муж Вольгі Сяргей — бізнэсовец, дэвелапер, пісьменнік, заснавальнік школы англійскай мовы EnglishPapa і апарт-гатэля Aviator на Балі. Фота: фэйсбук
Вольга ж працягвае выкарыстоўваць свой бэкграўнд і вучыць людзей гучаць больш упэўнена, працуючы як трэнерка па голасе і маўленні.
«Вы ўласнік бізнэсу ці топ-менеджар і хочаце натхняць і матываваць? Вы эксперт сваёй справы і хочаце пераканаўча дзяліцца ведамі? Вы блогер, але ад вашага голасу не бягуць мурашкі ў слухачоў? Вы марыце працаваць у кадры і выступаць перад публікай? Вы хочаце ўзмацніць асабісты брэнд і расці ў кар’еры, каб зарабляць большыя грошы?», — заваблівае Вольга патэнцыйную мэтавую аўдыторыю на сваім сайце.
Займацца сваім голасам з экс-вядучай можна як індывідуальна, так і ў групе. Кошт такіх заняткаў розны, у залежнасці ад выбару пакета: напрыклад, персанальныя штотыднёвыя відэазаданні з разборам анлайн абыйдуцца ў $100 за гэты самы тыдзень (дадаткова навучэнцам адкрываюцца відэаўрокі). Месячнае навучанне ў групе на 8 чалавек каштуе $200.
Чытайце таксама:
Навошта былы вядучы АНТ Іван Падрэз далучыўся да блогеркі Мартынавай і ідзе ў Кардынацыйную раду?
Былы вядучы БТ Аўчыннікаў расказаў пра закуліссе працы, расчараванні і дапамогу палітвязням
