Jaki hipiermarkiet samy tanny i samy darahi? Ad «Jeŭraopta» da «Bihza» — rejtynh
Minčuki majuć bahaty vybar, dzie zakuplacca praduktami na tydzień. Na kaniec 2012 hoda ŭ Minsku pracavali 13 hipiermarkietaŭ pad siamiu brendami — čatyry «Hipa», try «Prastory», dźvie «Karony», adzin «Jeŭraopt», «Susiedzi», «Bihz» i «Bimart». Kali vialikaja krama znachodzicca pad bokam, pytańnie, kudy jechać, nie paŭstaje.
U advarotnym vypadku pryhledźciesia da našaha śpisa. My skłali rejtynh kramaŭ — ad tych, chto najbolš kłapocicca pra hrošy svaich klijentaŭ, da tych, chto, naadvarot, padymaje handlovuju nacenku ŭsio vyšej.
Naša daśledavańnie nie pretenduje na navukovaść, ale atrymałasia pakazalnym. Jak my ličyli? «Naša Niva» abrała advolnyja 18 zapatrabavanych tavaraŭ — i praduktaŭ, i pramtavaraŭ. Zusim tannyja tavary, naprykład, chleb ci małako, my nie razhladali — roźnica ŭ ich canie budzie minimalnaj. Toje ž datyčyć cukru i harełki, dzie ceny rehulujucca dziaržavaj.
Takim čynam, u našym praduktovym košyku varanaja kaŭbasa najvyšejšaha hatunku, file fareli, blašanka sałodkaj kukuruzy, šakaładka, a taksama mandaryny i churma.Z pradukcyi ŭłasnaj vytvorčaści hipiermarkieta nabudziem śviny farš, katlety pa-kijeŭsku i sušy. Pić budziem kavu, niektar, piva i elitny viski. Narešcie, u niepraduktovym śpisie — modny žanočy časopis, miakkaja cacka, stanok dla haleńnia, pralny parašok i achałodžvalnaja vadkaść dla aŭtamabila.
My pierapisali ceńniki ŭ kožnym z hipiermarkietaŭ. Krama, u jakoj tavar byŭ samym tannym, atrymlivała 10 bałaŭ, samym darahim — 1 bał.Pramiežkavyja bały naličvalisia praparcyjna roźnicy ŭ canie. Kali tavaru ŭ kramie nie było, što ž, stavili siarednija piać bałaŭ.
Pieramožca bačny adrazu — heta «Jeŭraopt». Pałovu z pradstaŭlenych u našym śpisie tavaraŭ najvyhadniej nabyvać mienavita ŭ hetym hipierdyskaŭntary.Ceny ŭ astatnich kramach sietki mohuć być trochi vyšejšymi, ale litaralna na 100-200 rubloŭ. Asartymient u «Jeŭraopcie» nie nadta šyroki, ale tannyja anałahi znajści zaŭsiody možna.
«Prastor» Juryja Čyža zamacavaŭsia na druhim miescy, ale pa cenach na pramysłovyja tavary maje ŭpeŭnienaje lidarstva. Što ździviła, dyk heta adsutnaść u prodažy niektaraŭ «Sočny» — samych papularnych u krainie. Vidać, nie syšlisia charaktarami…
«Hipa» vyłučajecca tannaj impartavanaj rybaj i niedarahoj kulinaryjaj ułasnaha vyrabu.
Samy zahadkavy i nieviadomy staličny hipiermarkiet — «Bi-mart». Jon znachodzicca na Minskaj kalcavoj darozie kala Uručča, na miescy budaŭničaj kramy «Dekorum». Dabracca da jaho hramadskim transpartam niemahčyma, sustreć u apuściełaj handlovaj zale inšych pakupnikoŭ taksama składana… Vybar pramysłovych tavaraŭ niebahaty. Razynka kramy — mahčymaść patelefanavać zahadzia i paprasić skłaści dla ciabie vazok patrebnych praduktaŭ. Paśla dastatkova zaskočyć u kramu i zabrać ich.
«Susiedzi» — sietka kramaŭ, jakaja adkryła svoj hipiermarkiet apošniaj. Niazručnaje transpartnaje złučeńnie z žyłymi rajonami robić jaho aryjentavanym na žycharoŭ Daŭhinaŭskaha trakta, Navinak i Cnianki. Ceny ž — siarednija pa horadzie.
Samyja darahija minskija hipiermarkiety — «Karona» i «Bihz», pryčym ź vialikim adryvam ad kankurentaŭ.U apraŭdańnie «Karony» možna adznačyć darmovyja pakiety, jakija vydajucca pakupnikam, doŭhi čas pracy — ažno da 2-j nočy — i raźmiaščeńnie ŭ centry horada. A voś pazicyi «Bihza» mocna padkasiła darahaja kulinaryja, pa niekatorych pazicyjach udvaja daražejšaja za astatnija.
Usie hipiermarkiety Biełarusi
«Jeŭraopt» (AAT «Jeŭrahandal») — 6 hipiermarkietaŭ (Minsk, Babrujsk, Brest, Viciebsk, Homiel, Žłobin). Ułaśniki — Siarhiej Litvin i Uładzimir Vasilka. Dola abarotu sietki ŭ roźničnym handli Biełarusi — 7,8%.
«Hipa» (IP «Biełvilesden»)– 6 hipiermarkietaŭ (Minsk, Homiel, Mahiloŭ). Ułaśnik — Aleh Baranoŭski. Dola abarotu sietki — 1,7%.
«Karona» (TAA «TytuńInviest») — 5 hipiermarkietaŭ (Minsk, Babrujsk, Brest, Viciebsk). Ułaśniki — Pavieł Tapuzidzis i Viktar Piatrovič. Dola abarotu sietki — 2,3%.
«Prastor» (SZAT «Prastor¬Markiet») — 3 hipiermarkiety (Minsk). Ułaśnik — Juryj Čyž. Dola abarotu sietki — 1,6%.
«Susiedzi» (STAA «Libretyk») — 1 hipiermarkiet (Minsk). Ułaśnik — Ałma Jaŭncemienie. Dola abarotu sietki — 1,3%.
«Bihz» (STAA «Banijar») — 1 hipiermarkiet (Minsk).
«Bi-mart» (STAA Tałmi¬Bieł») — 1 hipiermarkiet (Minsk).
«Ałmi» — 1 hipiermarkiet (Hrodna). Ułaśnik — Alaksandr Zarybka. Dola abarotu sietki — 1,4%.
«Hryn» (hrupa kampanij Rapa) — 1 hipiermarkiet (Salihorsk).
Što takoje hipiermarkiet?
U biełaruskich dziaržaŭnych standartach adsutničaje aznačeńnie «hipiermarkiet». A voś u susiedniaj Rasii jość dakładnaja farmuloŭka: handlovy abjekt płoščaj ad 4 tysiač kvadratnych mietraŭ, šyrokim asartymientam i zonaj absłuhoŭvańnia.
Zadoraha ci zatanna?
Pakul pakupniki narakajuć na vysokija ceny ŭ hipiermarkietach, pradprymalniki, naadvarot, aburajucca zanižanymi cenami i niesumlennaj kankurencyjaj. Vialikija sietki patrabujuć u pastaŭščykoŭ źnižku 30-40%, čaho nie mohuć sabie dazvolić astatnija ŭdzielniki rynku. Respublikanskaja kanfiederacyja pradprymalnikaŭ patrabuje pryniać zakon «Ab hipiermarkietach», u jakim rehłamientavać praviły handlu.
