Siarhiej Darafiejeŭ: Možna jašče kazać, što ja častkova pradaŭsia Kramlu

Jeŭraradyjo: Čamu vy pryniali rašeńnie pamianiać miesca pracy: pajści z “5 kanała” na “Inter”?

Siarhiej Darafiejeŭ: Ja baču na “Intery” bolš mahčymaściaŭ dla realizacyi siabie jak mieniedžara i viadučaha, čym było na “5 kanale”. Što ž tyčycca majho pierachodu, to ja nikoli nie dumaŭ, što navina pra moj pierachod na inšy telekanał vykliča takoje abmierkavańnie – hetymi dniami i va Ukrainie, i ŭ Biełarusi jość bolš važnyja temy. I tym bolš ja nie dumaŭ, što źjaviacca takija niekarektnyja zajavy niekatorych maich kaleh.

Ja chaču ŭsich zapeŭnić, što pryncypy niezaležnaj žurnalistyki ja budu nieści i dalej – jak heta rabiŭ i ŭ Biełarusi, i na “5 kanale”.

A ŭsio toje, što ciapier adbyvajecca va ŭkrainskaj miedyjaprastory, daje padstavy mierkavać, što ŭ adnosinach da mianie pačałasia kampanija pa dyskredytacyi. Na žal, va Ukrainie heta – sprava zvykłaja. Z hetaj nahody ja nakiravaŭ list ŭ vydańnie “Telekrytyka” sa svajoj pazicyjaj i z tłumačeńniami – što i jak nasamreč adbyvałasia i adbyvajecca.

Uvohule, pierachod viadučych z adnaho kanała na inšy va Ukrainie zaŭsiody nie cichi praces.

I chto staić za hetaj kampanijaj mnie viadoma. Ale toj fakt, što ŭkrainskamu vydańniu “Telekrytyka” ja dvuma słovami paćvierdziŭ svoj pierachod z adnaho kanała na inšy, nijakim čynam nie parušaje maich damoŭlenaściaŭ z “5 kanałam”. U pryvatnaści, nakont vypusku pres-reliza, dzie ŭsia infarmacyja budzie vykładzienaja padrabiazna. Z hetaj nahody mnie prykra, što maje biełaruskija kalehi biazdumna pieradrukavali infarmacyju ŭkrainskich vydańniaŭ, i nichto nie pakłapaciŭsia patelefanavać mnie pa kamientar. Čamu niama hetaha boku? Ukrainski miedyjarynak, u adroźnieńnie ad biełaruskaha, nasyčany. Kožnaje ŚMI maje svajho ŭłaśnika, a značyć, nie moža ličycca niezaležnym. U źviazku z hetym ja chaču davieści svajmu biełaruskamu kalehu, jaki pieršy padaŭ infarmacyju pra moj pierachod: nazyvać kanał “Inter” praŭładnym, a “5 kanał” – niezaležnym, heta najmienš – niekarektna.

Jeŭraradyjo: Heta adzinaja “niedakładnaść”?

Siarhiej Darafiejeŭ: Pra svaju pracu ŭ prajekcie “Pozaoči” ja ŭpieršyniu pačuŭ ad vydańnia “Telekrytyka”. I ni pra što takoje mieniedžmient “Intera” sa mnoj nie havaryŭ. Tamu navat kamientavać heta nie budu. Tolki skažu, što prahramu “Pozaoči” byłaja supracoŭnica “5 kanała” nikoli nie viała, jak piša biełaruskaje infarmahienctva. Biełaruskija kalehi, uvažliva pracujcie z krynicami infarmacyi.

A što tyčycca takoj ŭpeŭnienaj zajavy hienieralnaha pradziusara “5 kanała” Juryja Stecia – u im niama ni słova praŭdy! Jon zajaviŭ, što pryčyny parušeńnia maich damoŭlenaściaŭ z “5 kanałam” treba šukać u maich damoŭlenaściach z uładalnikami “Intera” Firatašam i Lovačkinym. A dalej, maŭlaŭ, dadumajcie sami. Nijakich damoŭlenaściaŭ – ni vusnych, ni piśmovych – z “5 kanałam” ja nie parušaŭ, ni ź Firtašam, ni ź Lovačkinym ni pra što nie damaŭlaŭsia. Ale jany nasamreč źjaŭlajucca akcyjanierami “Intera”, i kali jany zachočuć sa mnoj sustrecca, ja ź imi, biezumoŭna, sustrenusia. Jak sustrakaŭsia z uładalnikam “5 kanała” Piatrom Parašenkam. Heta narmalna, kali supracoŭniki sustrakajucca z kiraŭnictvam, z uładalnikami i akcyjanierami. Usie ŭmovy svajho pierachodu ja abmiarkoŭvaju z supracoŭnikami top-mieniedžmientu “Intera” i “5 kanała”.

Jeŭraradyjo: Byŭ jašče adzin punkt, na jaki źviarnuli ŭvahu vyklučna ŭsie ŚMI…

Siarhiej Darafiejeŭ: Tak, ja ciapier sapraŭdy rychtujusia da intervju z patryjarcham Kiryłam.

Ale toj, chto pra heta paviedamiŭ i takim čynam chacieŭ mianie skampramietavać, praličyŭsia – zapis intervju pryznačany na dzień, kali ŭ mianie niama efiru na “5 kanale”. I vyjdzie jon u efir na “Intery” tady, kali ja ŭžo sydu z efiru “5 kanała”. I toje, što ja rablu ŭ svoj vychodny dzień, heta maja asabistaja sprava. Krasavik – apošni miesiac majoj pracy na “5 kanale”. Praca ciaham hetaha miesiaca da apošniaha dnia ŭzhodnienaja z kiraŭnictvam prahramy “Čas. Pidsumki dnia”, viadučym jakoj ja źjaŭlajusia, jak i prahramy “Partrety”. A pra toje, što ja pierachodžu na “Inter”, na “5 kanale” viedali ŭsie. Zajava pra zvalnieńnie ŭžo daŭno lažyć u adździele kadraŭ.

Jeŭraradyjo: Hazieta “Ukrainskaja pravda”, padajučy infarmacyju pra vaš pierachod, nazvała vas “prałukašenkaŭskim” žurnalistam…

Siarhiej Darafiejeŭ: Heta vydańnie straciła dla mianie reputacyju niezaležnaha ŚMI. Mienavita “Ukrainskuju pravdu” tak aktyŭna cytavali biełaruskija maśmiedyja. U subotu jany napisali: “Prałukašenkaŭski Darafiejeŭ budzie słužyć Lovačkinu”. Pryčym, “prałukašenkaŭski” ŭ ruskaj viersii sajta napisana z pamyłkami. Ja źviarnuŭsia da aŭtaraŭ hetaha zahałoŭka: “Kali vy vykarystoŭvajecie słova “słužyć”, to nie mierajcie svajoj mierkaj usich astatnich –- heta vaša słova i vaš trend pracy, jak ja razumieju”. Frazu “prałukašenkaŭski Darafiejeŭ” moh napisać tolki toj čałaviek, jaki ničoha pra mianie nie viedaje. Roŭna, jak i fraza, jakaja sustrakałasia ŭ inšych vydańniach, “apazicyjny Darafiejeŭ”, jana taksama niapravilnaja.

Jeŭraradyjo: Takim čynam, dla kiraŭnictva “5 kanała” vaš chutki pierachod navinoj na staŭ?

Siarhiej Darafiejeŭ: Svoj pierachod ja abdumvaŭ davoli praciahły čas. Nieadnarazova sustrakaŭsia z uładalnikam “5 kanała” Piatrom Parašenkam, i ŭsie niuansy majho pierachodu byli ź im abumoŭlenyja. Nijakich niečakanaściaŭ ni dla ŭładalnikaŭ, ni dla top-mieniedžmienta, ni dla supracoŭnikaŭ “5 kanała” ŭ maim pierachodzie niama. Uvohule, u adpaviednaści z ukrainskim zakanadaŭstvam ja maju prava zvolnicca 8 krasavika. Ale Piotr Parašenka paprasiŭ mianie adpracavać jašče krasavik, kab mnie paśpieli znajści zamienu, i ja pajšoŭ nasustrač. Choć razumieju, što heta nie raduje top-mieniedžaraŭ kanała “Inter”. Ale jość prośba, ja na jaje adreahavaŭ, i ŭsie baki heta zrazumieli. Tamu ŭsie śpiekulacyi vakoł hetaha –- nie bolš za kampanija pa majoj dyskredytacyi, raspačataja peŭnymi ludźmi, jakich ja viedaju.

Jeŭraradyjo: U čym pryčyna hetaj “kampanii pa dyskredytacyi”?

Siarhiej Darafiejeŭ: Adzin kanał nie choča mianie adpuskać, inšy – choča bačyć mianie svaim supracoŭnikam. Pryroda ŭsich hetych pracesaŭ lažyć tut. A nazyvać proźviščy tych, chto za hetaj kampanijaj staić, – jany ničoha nie skažuć biełaruskaj aŭdytoryi.

Uvohule, historyja ŭkrainskaj žurnalistyki maje bieźlič prykładaŭ taho, jak ludzi pierachodzili z adnaho kanała na inšy, majučy taki ž “šlejf”, –- ničoha nadzvyčajnaha ŭ hetaj situacyi niama.

Jeŭraradyjo: Na inšy kanał vy pryjdziecie ź niejkimi svaimi prajektami?

Siarhiej Darafiejeŭ: Biezumoŭna, u mianie dastatkova idej, jak i ŭ top-mieniedžmienta “Intera”, jakija jany prapanujuć mnie. Kali my sydziemsia na niečym kankretnym, peŭnych farmatach, ich asablivaściach, štatnych raskładach prahramy –- ja padpisvaju kantrakt. Praca nad hetym ciapier idzie.

Jeŭraradyjo: ŚMI ŭvahu źviarnuli na toje, što ŭładalnik “Intera” – kiraŭnik administracyi prezidenta Ukrainy…

Siarhiej Darafiejeŭ: A čamu biełaruskija žurnalisty ŭ hetaj situacyi nie kažuć pra toje, što ŭładalnik “5 kanała” Piotr Parašenka – bahaty čałaviek, palityk, ličyć siabie apazicyjanieram. Čamu jany nie ŭchapilisia za heta?!

Jeŭraradyjo: Voś i atrymlivajecca, što vy sychodzicie ad apazicyjaniera da – praŭładnaha!

Siarhiej Darafiejeŭ: Usie vydatna viedajuć, jak ja pracavaŭ na kanale ANT, jaki nazyvajuć praŭładnym va Ukrainie. Bo nie viedajuć, što ŭ Biełarusi inšych telekanałaŭ niama. Usie viedajuć, jak ja pracavaŭ na “5 kanale”. Tamu

čakać ad mianie rezkaj źmieny pazicyi, maich žurnalisckich pryncypaŭ na “Intery” – tak mohuć kazać tolki ludzi, jakija pra mianie nie viedajuć ničoha.

Kali ja hadoŭ praź dziesiać iznoŭ budu pracavać na kanale ANT – nu, što ž, kažycie pra mianie, što ja iznoŭ praŭładny žurnalist. Ja tak stamiŭsia ad hetych kliše, što ŭžo nie źviartaju na ich uvahi! Pracavać albo na adzin fłanh, albo na inšy – heta parušaje pryncypy niezaležnaj žurnalistyki. Hramadskich maśmiedyja niama ni va Ukrainie, ni ŭ Rasii, ni ŭ Biełarusi. Kali ja ŭładkoŭvaŭsia na “5 kanał”, to ŭsie kazali: “Syšoŭ ź dziaržaŭnaha kanała i rezka pierajšoŭ da apazicyi – usio zrazumieła!” Ciapier, kali ja sychodžu na kanał, jaki častkova naležyć ludziam ad ułady, možna krytykavać u hety bok. Darečy, častka akcyj “Intera” naležyć maskoŭskamu “1 kanału”, byłomu ART. Čamu ž vy tady nie abvinavačvajecie mianie ŭ tym, što ja sychodžu pracavać na Kreml? Viedajecie, ja ŭžo spakojna reahuju na abvinavačvańni ŭ tym, što ja –- ahient FSB, što ja -- ahient biełaruskich śpiecsłužbaŭ. U Biełarusi heta tolki nabyvaje moc, a va Ukrainie isnuje daŭno -- trolinh na forumach. Cełyja armii botaŭ, jakija adpracoŭvajuć tyja ci inšyja zamovy pa farmavańni, jak jany dumajuć, hramadskaha mierkavańnia.

Jeŭraradyjo: Vy kažycie pra bolšyja pierśpiektyvy na “Intery”, ale moža pryčyna pierachodu banalnaja – ŭ bolšym zarobku?

Siarhiej Darafiejeŭ: Kali ja atrymaŭ prapanovu ad kanała “Inter”, kiraŭnictva “5 kanała” prapanavała mnie nievierahodna vyhodnyja ŭmovy -- i finansy, i karjernyja pierśpiektyvy. Tamu kazać, što Darafiejeva pierakupili, nie pravilna. Kali b ja pravioŭ krychu inakš efir 19 śniežnia 2010 hoda na kanale ANT, to atrymaŭ by surjoznyja dyvidendy. Ja hetaha nie zrabiŭ. Heta moj adkaz na pytańnie: “Ci pradajecca Darafiejeŭ?”

Jeŭraradyjo: Vy nasamreč viedali 19 śniežnia, što vas čakajuć peŭnyja dyvidendy?

Siarhiej Darafiejeŭ: Tak. Ale ja nie budu kazać, što za jany. Što da “Intera”, to tam u mianie bolš mahčymaściaŭ dla realizacyi siabie ŭ jakaści miedyjamieniedžara i viadučaha, čym na “5 kanale”. “Inter” –- heta vialiki telezavod. Tam ja zmahu na praktycy realizavać usie maje viedy, jakija ja atrymaŭ padčas zamiežnych stažyrovak, i atrymlivać novyja viedy. A kali b mnie prapanavali pracu na vialikim rasijskim kanale, to była b infarmacyja, što ja kančatkova pradaŭsia Kramlu, a nie častkova, jak ciapier.

Jeŭraradyjo: Vas nie pałochaje toje, što vy debiutujecie na “Intery” ź intervju z patryjarcham Kiryłam, jakoha nie ŭsie lubiać va Ukrainie?

Siarhiej Darafiejeŭ:

Intervju z patryjarcham Kiryłam nie budzie pieršym vypuskam majoj aŭtarskaj prahramu na “Intery”. Heta razavaje intervju, i jano nie budzie mieć dačynieńnia da maich budučych prahram.

Moj debiut na “Intery” budzie inšym. Što da “carkoŭnaha pytańnia”, to nie tak daŭno ja ŭ miežach prahramy “Partrety” zrabiŭ intervju z patryjarcham Fiłaretam. Heta ŭkrainskaja pravasłaŭnaja carkva, Kijeŭski patryjarchat, jaki Maskoŭski patryjarchat ličyć niekananičnym, i jon nie pryznany nivodnaj pravasłaŭnaj carkvoj. Tamu abvinavačvać mianie ŭ tym, što ja daju słova tolki adnamu čałavieku, nie pravilna. Tym bolš, što heta nie ja daju słova – heta rašeńnie telekanała.

Źmicier Łukašuk, Jeŭraradyjo

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH