Kaciaryna Kibalčyč: «Nie chočacca zajmacca pierakryžavanym apyleńniem»
Abnoŭlenyja kursy «Mova ci kava» viartajucca ŭ Minsk 13 studzienia.
13 studzienia amataraŭ biełaruskaj movy čakaje vybar: pajści na novyja kursy sa staroj nazvaj «Mova ci kava» ŭ halerei CECH ci naviedać dobra znajomyja zaniatki ŭ halerei «Ŭ» pad novaj nazvaj «Mova nanova».
Žurnalistka Kaciaryna Kibalčyč patłumačyła «NN», čaho čakać ad abnoŭlenaj «Movy ci kavy».
Užo nie sakret, što «Mova nanova» adkałołasia ad «Movy ci kavy» ŭ vyniku kanfliktu arhanizataraŭ na hlebie farmatu zaniatkaŭ. U «Movy nanova», jakuju ciapier budzie rabić Hleb Łabadzienka, farmat zastaniecca niazmniennym. A «Movu ci kavu» viersii «2.0» Kaciaryna Kibalčyč nazyvaje prajektam, jakoha jašče nie było ŭ Biełarusi.
«2013 hod byŭ dla mianie šalony. Nikoli ŭ žyćci raniej ja nie zajmałasia biełarusizacyjaj navat tearetyčna i amal nie razmaŭlała pa-biełarusku. A tut, jak u pjesie Hryškaŭca: «Pračynaješsia, i ty - husar. I koń tvoj ciabie viedaje». I nikudy ŭžo nie padzieniešsia.
Za hod u Minsku i Maskvie prajšło kala 70 zaniatkaŭ. Ja raźbirała z ałoŭkam płany ŭrokaŭ.
Kursy masavyja - heta kłasna, ale jany pavinny być modnymi. I voś z hetym zaŭsiody składaniej. Dla dvuchmiljonnaha Minska 100 čałaviek na zaniatku — kropla ŭ mory.
A voś kali placoŭka «Mova ci kava» stanie miescam zboru samych prahresiŭnych ludziej,
kali tam buduć abmiarkoŭvacca trendavyja temy, to biełarusizacyja vypluchniecca za miežy našaha zvykłaha katła. Tamu što zajmacca «pierakryžavanym apyleńniem» — kali na vačach pastajanna adnyja i tyja ž ludzi — nie pravilna i nie cikava asabista mnie.
Usim viadomyja «Viečary ŭ Politechničnym». Z dyskusijami i haračymi sprečkami, lekcyjami.
U naš čas «Fejsbuk» zadavoliŭ patrebu ludziej vykazvacca. A my ž sprabujem stvaryć takuju «žyvuju» biełaruskamoŭnuju placoŭku.
Składana navučyć ludziej hramatycy, kali jany siadziać u pierapoŭnienym pamiaškańni, ale dla moŭnaj praktyki heta ŭdałaje asiarodździe.
Vykładčyki buduć prydumlać kantent — jak dać mahčymaść vykazacca kožnamu, i kab razmova była pavažlivaj. I kab ludzi (niezaŭvažna dla siabie) vyvučali biełaruskuju movu.
Tym bolš, što imuls dadzieny, i
mnie viadomyja, jak minimum, dźvie niezaležnyja placoŭki ŭ Minsku, jakija z 2014 hoda pačnuć niefarmalna vyvučać biełaruskuju movu pa mietodycy, padobnaj da našaj»,
— kaža Kibalčyč.
Kaciaryna Kibalčyč raskazała i pra pieršy zaniatak madernizavanych kursaŭ: što budzie abmiarkoŭvacca, chto budzie vieści zaniatak i kaho zaprasili ŭ jakaści hościa.
«Pa-pieršaje, budzie akcent na haściej i dyskusiju. Mnie cikava stvaryć placoŭku, dzie možna dyskutavać na aktualnyja, trendavyja temy.
Na pieršym zaniatku adbudziecca prezientacyja mini-razmoŭnika «hramadskaje charčavańnie». Z hetaj nahody my źbirajem restarataraŭ i supracoŭnikaŭ śfiery hramadskaha charčavańnia,
kab dyskusija atrymałasia bolš roznabakovaj. Pryjduć haspadary bara «Tutejšyja», jakija niadaŭna apynulisia ŭ centry skandała z-za infarmacyi pra «źnižki biełaruskamoŭnym».
U jakaści «śviežaj hałavy» pryjdzie Palina Respublika.
Dalej buduć temy
«rekłama», «mova internetu», navat pravakatyŭnaja «ruskija ŭ horadzie» —pra «haściej stalicy» jakich bačym na vychodnych.
Druhaja zaduma – dać našu placoŭku roznym talenavitym ludziam, kab jany pasprabavali siabie vykładčykami
Zaniatki buduć vieści niekalki par vykładčykaŭ. U kožnaha moža być svaja aŭdytoryja i heta kruta.
Viadoŭcami ŭ 2014 hodzie zastanucca pa raniejšamu: Aleś Zaleŭski, Vasil Drańko-Majsiuk, Volha Vierbiłovič, Andruś Takidanh, Aleś Čajčyc. Dałučacca i novyja: Uładź Lankievič, Alena Piatrovič, Franak Viačorka, Valaryna Kustava», — paviedamiła Kaciaryna Kibalčyč.
Čakajucca i technałahičnyja cikavostki:
dla tych, chto nie zmoža prysutničać na zaniatku, a taksama dla ŭsich achvotnych budzie zdymacca videaviersija
zaniatkaŭ. Arhanizatarka kursaŭ upeŭniena, što novaja «Mova ci kava» zacikavić u pieršuju čarhu moładź. A svojeasablivym «filtram» aŭdytoryi, jaki sfarmuje jaje kaściak, stanie sam farmat kursaŭ — źmiest i napaŭnieńnie prahramy pryciahnie tych, chto zachoča zajmacca i stała naviedvać «Movu ci kavu».
Zaniatki buduć adbyvacca paniadziełkami, a 19-j u halerei «CECH» (pr.Niezaležnaści, 58, korpus 6).
Taksama ŭ paniadziełak 13 studzienia ŭ halerei «Ŭ» (pr.Niezaležnaści, 37a), projdzie zaniatak kursaŭ «Mova nanova», jaki buduć vieści Hleb Łabadzienka i Alesia Litvinoŭskaja. Pačatak a 19-j.
