Pryvatnaja rezidencyja miljaniera Tapuzidzisa na Naračy FOTY
Biznesmien braŭsia pabudavać na voziery hatel i vodny centr.
Naračanski kraj — adno z samych malaŭničych miescaŭ u Biełarusi. Štohod siudy pryjazdžajuć na adpačynak tysiačy ludziej. Turystyčny patencyjał najbujniejšaha voziera krainy dahetul nie vyčarpany.
Ułady ŭzialisia za Narač jašče ŭ siaredzinie minułaha dziesiacihodździa, kali była pryniataja Dziaržaŭnaja prahrama ekałahičnaha azdaraŭleńnia voziera na 2005—2008 hady. Paśla jaje zaviaršeńnia i častkovaha vykanańnia byŭ sfarmulavany čarhovy dakumient — Dziaržaŭnaja prahrama raźvićcia kurortnaj zony Naračanskaha rehijona na 2011—2015 hady. Jaje realizacyju acanili ŭ $140 miljonaŭ.
Dźvie traciny ad hetaj sumy vydzialiłasia ź biudžetu, reštu musili dakłaści pryvatniki. Naprykład, kampanija «Lekt» biznesmiena Andreja Bałabina (jamu naležyć sietka kramaŭ techniki «Piaty elemient») źbirałasia budavać turystyčny kompleks u pasiołku Narač, brokierskaje adździaleńnie «Atłant-M» — bazu adpačynku na voziery Vialikija Švakšty.
A voś učastak pad zabaŭlalny vodny centr addali «Tytuń-Inviestu». U lipieni 2010 hoda Alaksandr Łukašenka pryjazdžaŭ na Narač, kab ahledzieć placoŭku pad abjekt. Dla zasnavalnika kampanii, miljaniera Paŭła Tapuzidzisa była arhanizavanaja sustreča z kiraŭnikom dziaržavy. Biznesmien pakazaŭ jamu makiet budučaha vodnaha centra.
Što było ŭ tym prajekcie? «Tut płanujecca pabudavać haściavyja damki (kožny na čatyry siamji) u styli XIX stahodździa, a taksama stvaryć centr dajvinhu, aerakłub», — pisała pa vynikach sustrečy BiełTA. «Heta mienavita toje, što patrebna dla adpačynku ludziam», — padsumavaŭ tady Łukašenka i pryznaŭsia, što sam z zadavalnieńniem adpačyŭ by ŭ takim miescy.
U vyniku ŭ prajekt raźvićcia Naračy na 2011—2015 hady zapisali, što «Tytuń-Inviest» pabuduje hatel i zabaŭlalny vodny centr ahulnym koštam $15 miljonaŭ.
Čas išoŭ, a nijakaj infarmacyi pra chod budaŭnictva nie było. A voś čytačy «Našaj Nivy» paviedamlali pra aktyŭnaść «Tytuń-Inviesta» ŭ naračanskim krai.
«Tam čas ad času lotajuć na biełym viertalociku, katajuć pa voziery visklavych dzievak na bananie za kataram dy pieryjadyčna źlivajuć pamyi ŭ voziera, ad čaho smurod dachodzić až da susiedniaj vioski. Pry hetym, «pryvatyzavaŭšy» zdaravienny kavałak uźbiarežža ŭ Naračanskim zapaviedniku», — skardzilisia ŭ Redakcyju.
Niaŭžo vodny centr užo adkryŭsia? U kampanii «Tytuń-inviest» doŭha navat nie mahli zrazumieć, pra jaki abjekt idzie havorka.
Jak vyśvietliłasia, Pavieł Tapuzidzis tak i nie pačaŭ budaŭnictva, pra jakoje abiacaŭ Alaksandru Łukašenku. Miascovyja ŭłady čakali hod za hodam, ale marna. Namieśnik staršyni Miadzielskaha rajvykankama Leanid Bierniakovič patłumačyŭ, što sioleta viasnoj učastak byŭ adabrany ŭ inviestara.
Tady dzie ž miljanier «lotaje na biełym viertalociku»?
Kali Tapuzidzis zapisvaŭsia ŭ inviestycyjnuju prahramu Naračy, jon užo byŭ u favarytach u miadzielskaha kiraŭnictva.
Za hod da sustrečy z Łukašenkam na kurorcie biznesmien atrymaŭ ziamlu na voziery Miadzieł, susiednim z Naračču. Na hetych 90 sotkach kala vioski Vałočak «Tytuń-Inviest» sabraŭsia budavać azdaraŭlenčy kompleks. Ziamla dastałasia na samym bierazie — častka ŭ prybiarežnaj pałasie, rešta ŭ vodaachoŭnaj zonie.
Kolki kaštavaŭ Tapuzidzisu hety ŭčastak?
Mahčyma, u dakumienty Nacyjanalnaha kadastravaha ahienctva zakrałasia prykraja abdrukoŭka, pakul što tam paznačana, što «Tytuń-Inviest» štohod płacić za ziamlu «,87 USD». Akurat tak, z koskaj na pačatku. Albo tam 0 u pačatku, albo niešta inšaje.
Termin arendy skłaŭ tradycyjnyja 99 hadoŭ.
Turystu patrapić na tajamničuju terytoryju niemahčyma. Hravijka da Tapuzidzisa viadzie ad trasy R27 «Miadzieł—Brasłaŭ». Zboku zastajecca voziera Rudakova z bazaj adpačynku, jakuju marna sprabuje pradać praz aŭkcyjon kampanija «Amkador», paśla davodzicca prajechać mima vioski Vałočak.
Čym bližej da punkta pryznačeńnia, tym bolš zabaronaŭ. «Prajezd zabaronieny». Paśla «Ujezd zabaronieny». A narešcie jašče i «Stop», u dadatak da šłahbauma. Tych, chto ŭsio ž prarviecca, čakaje trochmietrovy płot. Za im — niby nie dušy.
Mała što mohuć raskazać pra novych susiedziaŭ i viaskoŭcy. Choć pra toje, što tam pabudavaŭsia mienavita «Tytuń-Inviest», viedajuć usie.
Damy adnaviarchovyja, nie raźličanyja na vialikuju kolkaść naviedvalnikaŭ.
Zastajecca zazirnuć na zakrytuju terytoryju z pavietra. Na spadarožnikavym zdymku vidać try budynki. Darečy, usie jany adnapaviarchovyja. Haściej sustrakaje korpus dla achovy i inšaha piersanału. Uśled za imi dva žyłyja zbudavańni, a taksama altanki.
Ujavić, što heta nasamreč azdaraŭlenčy kompleks, składana, choć abodva budynki i aformlenyja «dla lačebna-prafiłaktyčnych i sanatorna-kurortnych metaŭ». Mienšaha ź ich (na spadarožnikavym fota źleva) naŭrad ci chapiła b pad pracedurnyja kabiniety, pa płoščy jon jak trochpakajoŭka. Dyj bolšy dom raźličany chutčej na vialikuju siamju, čym na płyń adpusknikoŭ. Infarmacyi pra bazu niama ni ŭ śpisach turystyčnych abjektaŭ, ni siarod miedycynskich ustanovaŭ.
Kali hladzieć na bazu z procilehłaha boku voziera, bačny spusk da vady i bieł-čyrvona-bieły katar.
Niaŭžo zamiest vodnaha centra i azdaraŭlenčaha kompleksu «Tytuń-Inviest» pabudavaŭ tolki pryvatnuju rezidencyju ŭ vodaachoŭnaj zonie Miadzieła?
***
Pavieł Tapuzidzis u rejtynhu samych paśpiachovych i ŭpłyvovych biźniesmienaŭ Biełarusi zajmaje 4-je miesca.
Naradziŭsia 12 vieraśnia 1956. Maje hreckija karani, dziacinstva pravioŭ u Hruzii. Pačaŭ biznes na vytvorčaści cacačnych samalocikaŭ. U Biełarusi arhanizavaŭ kaapieratyŭ pa vypusku pachavalnych viankoŭ, paśla zaniaŭsia vytvorčaściu cyharet. Jahony «Tytuń-Inviest» — adzinaja pryvatnaja kampanija na cyharetnym rynku. Biznes asablivy, rašeńnie ab tym, kab addać jaho Tapuzidzisu było pryniataje na najvyšejšym uzroŭni.
Druhi hałoŭny biznes — sietka hipiermarkietaŭ «Karona», pradstaŭlenaja ŭ Minsku, Babrujsku, Barysavie, Breście, Viciebsku i Salihorsku. U skład handlovych centraŭ uvachodziać kramy techniki «Karona-Techna» i kramy adzieńnia «Modny Moł».
Hadlova-zabaŭlalny centr «Zamak», jaki znachodzicca nasuprać Pałaca Niezaležnaści, — najbolšy ŭ krainie, na jahonym vierchnim pavierchu navat adkrytaja ladovaja arena.
Na bierazie Zasłaŭskaha vodaschovišča adkryŭ elitny «Robinsan Kłab» — hatel, restaran, kłub i spacentr. Naviednikam prapanujuć prahułki na viertalocie.
«Robinsan-Kłab»
U časie prezidenckaj kampanii-2010 Pavieł Tapuzidzis byŭ staršyniom kamisii na adnym ź minskich vybarčych učastkaŭ.
Žonka Iryna ŭznačalvaje dabračynny fond «Krynica dabryni».
* * *
Historyja pośpiechu Paŭła Tapuzidzisa
