Pamior rasijski teatralny režysior Juryj Lubimaŭ
U Maskvie na 98-m hodzie žyćcia pamior vydatny režysior, zasnavalnik Teatra na Tahancy Juryj Lubimaŭ. Pra heta paviedamlaje «Interfaks» sa spasyłkaj na svaju krynicu.
«Juryj Piatrovič pamior u Botkinskaj balnicy, kudy jon byŭ dastaŭleny ŭ ciažkim stanie na hetym tydni», - skazała krynica. «Lekary rabili ŭsio mahčymaje, kab pastavić jaho na nohi, ale chvaroba akazałasia macniejšaj», - dadaŭ surazmoŭca ahienctva.
2 kastryčnika Juryj Lubimaŭ byŭ špitalizavany ŭ ciažkim stanie. Režysioru, jakomu 30 vieraśnia spoŭniłasia 97 hadoŭ, byŭ pastaŭleny dyjahnaz sardečnaja niedastatkovaść, paviedamlała ITAR-TASS jaho žonka Katalin Lubimava.
Juryj Lubimaŭ naradziŭsia 30 vieraśnia 1917 hoda. Jon zasnavaŭ Teatr na Tahancy ŭ 1964 hodzie. Režysior kiravaŭ im na praciahu 20 hadoŭ, da 1984 hoda, kali byŭ pazbaŭleny hramadzianstva SSSR. U 1989 Lubimaŭ znoŭ viarnuŭsia na pasadu mastackaha kiraŭnika Tahanki.
U červieni 2011 pamiž Lubimavym i trupaj teatra na hastrolach u Čechii adbyŭsia kanflikt. Z 15 lipienia 2011 hoda Lubimaŭ nie pracuje ŭ teatry.
Paźniej Lubimaŭ pačaŭ supracoŭničać ź inšymi teatrami. U červieni 2013 hoda ŭ Balšom teatry adbyłasia premjera opiery «Kniaź Ihar» ŭ jaho pastanoŭcy. 20 maja 2014 hoda ŭ teatry «Novaja opiera» adbyłasia premjera opiery-buf «Škoła žonak» pa kamiedyi Maljera ŭ pastanoŭcy Lubimava.
Hladzi taksama: Čałaviek, jaki stvaryŭ teatr.
