Pakul siezon. Hety šykoŭny piroh sa ślivami varta śpiačy jak najchutčej
Hety piroh aŭtarstva viadomaj stvaralnicy kulinarnych knih Dory Hrynspen ja prapanuju śpiačy jak najchutčej: całkam imavierna, što vam zachočacca paŭtaryć jaho nie raz i nie dva, pakul na ślivy jašče siezon.
Spałučeńnie vodaraŭ, tekstur i smakaŭ u im prosta niejmaviernaje, asabliva kali ŭziać ceły kardamon i samastojna zmałoć duchmianyja ziarniatki ŭ stupcy.
Kali lubicie bolš jahad u vypiečcy, vaźmicie vialikuju płoskuju formu i kładzicie ślivy ščylnieńka. Kali vam važniejšaje ciesta (a tut jano sapraŭdy vielmi smačnaje niezaležna ad śliŭ), možna ŭziać formu pamienš, ale vyšejšuju. U lubym vypadku, upeŭnienaja, vynik vas paraduje.
Vam spatrebicca:
- 1 1/2 šklanki muki
- 2 č.ł. razrychlalniku
- 1/4 č.ł. soli
- 1/4 č.ł. mołataha kardamonu
- 70 h masła pakajovaj tempieratury
- 3/4 šklanki cukru
- 2 vialikija jajki
- 1/3 šklanki aleju biez pachu (u mianie słaniečnikavy rafinavany)
- naciortaja cedra 1 apielsina
- 10 śliŭ (ci bolš, zaležyć ad ich pamieru i formy, u jakoj budziecie piačy)
Jak rabić:
1. Parezać ślivy napałam, vyniać kostki.
2. Masła krychu ŭźbić, dadać cukar, uźbivać razam kala dźviuch chvilin. Dadać pa adnym jajki, uźbivajučy paśla kožnaha jašče pa chvilinie.
3. Dadać alej i cedru apielsina, dobra pieramiašać miksieram.
4. U asobnaj miscy źmiašać muku, sol, razrychlalnik i kardamon.
5. Vysypać muku z dadatkami ŭ maślanuju sumieś, chutka pieramiašać.
6. Vykłaści ciesta ŭ zmazanuju masłam i prysypanuju mukoj formu, razraŭniać. Vykłaści ślivy razrezam uvierch.
7. Piačy kala 40 chvilin na 180ᵒS.
Čytajcie taksama:
Kali ŭsio pryjełasia, to hrušava-mindalnyja kieksy vas pryjemna ździviać
