Losavańnie ČS-2018 pa futbole — chto, što, jak i kali?
Lehiendarny forvard zbornaj Anhlii Hary Linekier i rasiejskaja spartovaja žurnalistka Maryja Kamandnaja zaŭtra ŭviečary praviaduć losavańnie Čempijanatu Śvietu pa futbole, jaki projdzie ŭletku ŭ Rasii, paviedamlaje FIFA.com. Asistavać im buduć 8 zorak suśvietnaha futboła — pavodle ličby adboračnych hrup.
Što treba viedać pra losavańnie i jak buduć namahacca stvaryć najbolej roŭnyja pa sile składy vaśmi hrup z ahulnaj ličby 32 kamand zaŭtra ŭ Kramli a 18.00 minskaha času?
Chto ŭ pieršym košyku?
Zhodna z zaćvierdžanaj praceduraju, siejanymi buduć siem najmacniejšych kamand rejtynhu FIFA plus Rasija jak haspadar turnira. Heta Niamieččyna, Brazilija, Partuhalija, Arhientyna, Bielhija, Polšča i Francyja. Nastupnyja try košyki pa vosiem kamand adpaviadajuć dalejšym miescam kastryčnickaha rejtynhu FIFA.
Jak budzie prachodzić losavańnie?
Brać šary z nazvami kamand unutry buduć pa čarzie, pačynajučy ź pieršaha košyka i skončvajučy čaćviertym. Pierachodzić da nastupnaha košyka buduć tolki paśla taho, jak pa hrupach ad A da N buduć raźmierkavanyja ŭsie vosiem kamand z papiaredniaha košyka.
Śpiecyjalny status Rasii — čamu?
Na pravach krainy-arhanizatara, asabliva paznačany šar z nazvaj zbornaj Rasii budzie ŭziaty pieršym, i jana aŭtamatyčna patrapić pieršaj kamandaj u hrupu A. Usie inšyja siejanyja kamandy buduć vyciahvacca ŭ losavym paradku i stanuć pieršymi numarami ŭ hrupach ad B da H.
Čym budzie adroźnivacca dalejšaje losavańnie?
Jano — pavodle arhanizataraŭ — skiravanaje na maksimalnuju spraviadlivaść farmavańnia hrup. Za vyniatkam Jeŭropy, ad jakoj na čempijanat prajšło 14 kamand, u hrupie nie moža być bolš, čym pa adnym pradstaŭniku ad kantynientalnaj kanfiederacyi. Tolki jeŭrapiejskija kamandy mohuć patrapić pa dźvie ŭ adnu hrupu.
Tamu spačatku asobna budzie losavacca šar z nazvaju kamandy — a tolki paśla šar z nazvaju hrupy i paradkavym numaram u joj. Kali limit pradstaŭnictva kantynientalnaj kanfiederacyi ŭ dadzienaj hrupie ŭžo vyčarpany, kamanda pieranosicca ŭ nastupnuju svabodnuju hrupu. Arhanizatary abiacajuć, što ŭsio budzie prazrysta i česna.
Składy dalejšych košykaŭ:
Druhi: Ispanija, Pieru, Šviejcaryja, Anhlija, Kałumbija, Mieksika, Uruhvaj, Charvatyja.
Treci: Danija, Isłandyja, Kosta-Ryka, Šviecyja, Tunis, Jehipiet, Sieniehał, Iran
Čaćviorty: Sierbija, Nihieryja, Aŭstralija, Japonija, Maroka, Panama, Respublika Kareja, Saudaŭskaja Aravija
