Pad finał ČS pa futbole. Recept kłasičnaj «Marharyty», jakuju lohka pieraŭtvaryć u lubuju inšuju picu
U niadzielu mnohija źbirajucca pravieści viečar kala ekrana z tranślacyjaj futbolnaha matča. I kali vy taksama nie razhladajecie inšy varyjant baŭleńnia času, to maja vam parada, jak padrychtavacca: padumajcie zahadzia pra pierakus, kab ničoha nie adciahvała vašu ŭvahu padčas hulni.
Ja liču najlepšym supravadžeńniem prahladaŭ picu: jaje lohka pryhatavać, jana vielmi pažyŭnaja, a varyjantaŭ načyńnia prosta niamierana.
Tut vy znojdziecie recept kłasičnaj «Marharyty», u jakuju lohka možna dadać lubyja ŭlublonyja vami inhredyjenty: roznyja syry, kaŭbasu, kurycu, hryby, ančousy i hetak dalej. Smačna jeści!
Dla ciesta:
- 500 hr. muki;
- 0,5 č. ł. soli;
- 7 hr. suchich droždžaŭ;
- 0,5 st. ł. cukru;
- 2 st. ł. aliŭkavaha aleju.
*Dla ciesta picy lepš za ŭsio brać mocnuju muku: z utrymańniem białku bolš za 11 hr. na 100 hr. muki.
Muku prasiejvajem horkaj, dadajom sol.
U asobnaj miscy źmiešvajem 320 mł ciopłaj vady, droždžy, cukar i alej. Pakidajem na niekalki chvilin, kab aktyvizavać droždžy.
Potym vylivajem sumieś na muku i miesim ciesta. Kładziom jaho paśla ŭ misku, prysypajem mukoj i nakryvajem ručnikom.
Pakidajem prykładna na hadzinu ŭ ciopłym miescy — za hety čas ciesta vyraście prykładna ŭdvaja.
Sous:
- 1 słoik kansiervavanych pamidoraŭ va ŭłasnym soku;
- 1 zubčyk časnaku;
- žmienia liścia baziliku;
- sol, pierac;
- na smak — kapiersy i čyrvony pierac.
Časnok drobna narazajem i krychu padsmažvajem na alei. Dalej taŭčom kansiervavanyja pamidory i ŭkidvajem ich da časnaku. Varym sous 10 chvilin na maleńkim ahni, časam pamiešvajučy. Pry kancy dadajom bazilik, sol i śpiecyi.
Ciesta dzielim na dźvie častki, abminajem i raskatvajem rukami ŭ kruh. Pieranosim ciesta na blachu, jakuju zahadzia zmazvajem alejem. Pakidajem tak jašče na chvilin 10. Źvierchu vykładvajem sous i dadajom kavałki macareły.
Vypiakajem 10 chvilin pry 220 hradusach.
