«90% rečaŭ — ad biełaruskich dyzajnieraŭ». Minskaja ajcišnica pakazvaje svoj patryjatyčny harderob
Minčanka Natalla Załatarova pracuje ŭ śfiery IT i zachaplajecca modaj. Tolki na šopinh jana adpraŭlajecca nie ŭ Miłan, a ŭ ajčynnyja kramy. 90% jaje harderobu — adzieńnie i aksiesuary biełaruskich dyzajnieraŭ. Natalla pakazała svaje vobrazy i raskazała, ci doraha heta — kuplać biełaruskaje i na jakija brendy varta źviarnuć uvahu.
Natalla ŭspaminaje, što ŭsio pačałosia ź jaje asabistaj cikavaści da rukadziella. U škole na ŭrokach pracoŭnaha navučańnia vyšyvała i viazała, doma lažali kuplenyja mamaj časopisy typu «zrabi sam». A kali pačali raźvivacca sacyjalnyja sietki, minčanka stała padpisvacca na roznych majstroŭ.
Pieršymi dyzajnierami, z tvorčaściu jakich jana paznajomiłasia, byli Nastaśsia Miranovič, Nastaśsia Łaryjonava i Julija Ačynovič.
— Na toj momant ja vyjšła z dekretu, i mnie patrebna było novaje adzieńnie, ale z mas-markietam u nas było nie vielmi dobra. Kali chočaš štości kupić — CUM, HUM sa standartnymi mierkami i rastoŭkaj na 170 sm. Ja, maleńki čałaviek 40-ha pamieru, nie mahła tam ničoha padabrać. Tamu mianie pryciahnuła, što dyzajniery mahli zrabić reč pad ciabie — naprykład, štany ŭšyć, błuzku padahnać.
Mnohija brendy Natalla adkryła dla siabie na Biełaruskim modnym markiecie — kirmašy dyzajnierskaha adzieńnia i aksiesuaraŭ. Naprykład, tam jana ŭbačyła słavutyja śvitšoty z busłami Volhi Kardaš.
— Mianie vielmi začapiła ideja prynta. Ja sama z Paleśsia, babula ŭ Stolinie žyła. Ščaślivaje dziacinstva asacyjavałasia ŭ mianie mienavita z busłami. I ja adrazu ŭ hety prynt ulubiłasia.
Ciapier bolšaść rečaŭ z harderobu ajcišnicy — dyzajnu Volhi Kardaš.
— Jana mnie spadabałasia svajoj minimalistyčnaściu. U jaje składany kroj, ale pry hetym prostyja rečy. A asobnyja detali dadajuć žanockaści — adkrytyja śpinki, razrezy, banciki na rukavach.
Siarod lubimčykaŭ Natalli — brend Limitedminsk (u ich možna znajści bazavyja kaściumy i śvitšoty z nacyjanalnym matyvam), Zibra (za ručnuju vyšyŭku i interpretacyju karcin Žaana Miro), siostry Dubajenka (šyjuć dobryja šarścianyja kasuchi, trykatažnyja sukienki i kaściumy). Ubory dla vychadu ŭ śviet minčanka raić šukać u Julii Łatuškinaj. Vierchniaje adzieńnie — u Citydzen i LSD.
Z dyzajnieraŭ Natalla adznačaje taksama brend Leorgofman.
— Heta adzieńnie premium-kłasa, ja b skazała. U ich kalekcyjach prasočvajucca suśvietnyja modnyja tendencyi.
Što da aksiesuaraŭ, to minimalistyčnyja ŭprahažeńni ź mietału na kožny dzień Natalla vybiraje ŭ Karavai (u ich taksama jość cikavyja kalje-transformiery), jarkuju bižuteryju z dekaratyŭnaj smały — u Vanilla Naomi. Siarod favarytaŭ — i dyzajnier Miła Ihnacik, jakaja lepić realistyčnyja kvietkavyja ŭpryhažeńni.
Tyja 10% harderobu, jakija nie ad biełaruskich vytvorcaŭ, składajuć bazavyja rečy (tyja ž džynsy, cišotki) i trendavyja. Natalla tłumačyć: niama sensu nabyvać u madeljeraŭ adzieńnie, jakoje chutka vyjdzie z mody.
— Tak, apranacca ŭ biełaruskich dyzajnieraŭ doraha, — pryznajecca minčanka. — Bo pracoŭnych ruk u ich mała, tkaniny darahija, arenda pamiaškańniaŭ šmat kaštuje. Dyzajniery zakładajuć u canu ŭsie ryzyki adzinkavaj vytvorčaści.
Kolki hrošaj spatrebicca, kab apranucca ŭ svajo? Śvitšoty ŭ asnoŭnym kaštujuć kala 200 rubloŭ, sukienki — 300, palito — usie 600.
— Jość tyja, chto vystaŭlaje zavyšanyja ceny, a jość i tyja, chto idzie nasustrač pastajannym klijentam i daje vialikuju źnižku, — dzielicca Natalla.
Za takija hrošy možna dazvolić sabie zamiežnaje adzieńnie premium-kłasa. Ale, kaža minčanka, u jaje jość pryčyny padtrymlivać biełaruskich vytvorcaŭ.
— Ja razumieju, nakolki heta ciažkaja praca — rabić štości rukami. Heta nie prosta sieŭ i sabraŭ try pacierki. Majstroŭ nasamreč, jakija vypuskajuć upryhažeńni, šmat, ale nie ŭsie jany sumlennyja — niekatoryja prosta kapirujuć idei inšych i kuplajuć kamplektujučyja na kitajskich sajtach. Jany nie ŭkładajuć u rečy dušu. A jość dyzajniery ŭnikalnyja, jakija prapanujuć štości novaje. I voś pra takich ja chaču raskazvać, bo ich pavinny viedać.
Natalla dadaje: na toje, kab chadzić pa kramach mas-markieta i šukać hodnyja rečy, joj škada času. A ŭ dyzajnieraŭ jana ŭžo viedaje asartymient i dakładna moža skazać, što joj padydzie. Plus adzieńnie z aŭtarskich kalekcyj dobra spałučajecca miž saboj.
Ź niekatorymi tvorcami Natalla paśpieła paznajomicca asabista.
— Dla mianie dyzajnier ujaŭlaŭsia čymści čaroŭnym. Dumała, što heta niedasiahalnyja asoby. A akazałasia, usie ludzi prostyja, adkrytyja, ź nialohkim šlacham da svajoj mary.
U dyzajnierskim adzieńni minčanka časta źbiraje kamplimienty.
— U padarožžach za miažoj da mianie padychodziać spytać, što heta za rečy. Asabliva kitajcy cikaviacca. Ludzi adrazu zaŭvažajuć, što ty apranuty niestandartna.
