U budynku Kupałaŭskaha teatra prajšoŭ pieradpremjerny pakaz «Paŭlinki»
Archiŭnaje fota, kupalauski.by
U Kupałaŭskim teatry adbyŭsia pieradpremjerny zakryty pakaz śpiektakla «Paŭlinka». Pra heta Tut.by paviedamili niekalki nie źviazanych pamiž saboj krynic.
U pres-słužbie Kupałaŭskaha paviedamili, što ŭ ich niama infarmacyi ab takim pakazie. Pavodle ich słoŭ, asobnyja strukturnyja padraździaleńni Teatra praciahvajuć zastavacca na prastoi.
Sa staroj trupy na scenu vyjšli litaralna niekalki čałaviek. Astatnija akciory nabranyja ŭ Kupałaŭski praz kastynh.
Pryčym siońnia, 28 śniežnia, adbyŭsia ŭžo nie pieršy pieradprahlad. Pierad hetym pakaz «Paŭlinki» prajšoŭ 26 ci 27 śniežnia.
Jak adznačaŭ jašče 14 śniežnia ministr kultury Anatol Markievič, havorka idzie pra «novuju viersiju znakamitaha śpiektakla «Paŭlinka».
Pa infarmacy Tut.by, havorka — pra tuju ž viersiju śpiektakla, što ŭ minułym siezonie pakazvaŭsia ŭ Kupałaŭskim. Apošni raz kaśmietyčnuju redakcyju śpiektakla ŭžo ŭ 2010-ja hady ažyćciaŭlaŭ režysior Mikałaj Pinihin. Pa adnoj viersii, akciory, što zastalisia ŭ trupie, sami ŭvodzili novych kalehaŭ u pastanoŭku. Pa inšaj, ź imi ŭsio-taki pracavaŭ niejki režysior. Ale chto mienavita, pakul nieviadoma.
Na sajcie Kupałaŭskaha teatra adsutničaje jakaja-niebudź infarmacyja ab premjery «Paŭlinki», kvitkoŭ u prodažy niama.
Nahadajem, što asnoŭnaja častka trupy Kupałaŭskaha syšła z teatra ŭ žniŭni ŭ znak pratestu suprać zvalnieńnia dyrektara teatra Paŭła Łatuški i ahulnaj situacyi ŭ krainie. Na hety momant sa staroha składu zastałosia ŭsiaho 12 čałaviek.
