Biełaruski film trapiŭ u prahramu Bierlinskaha kinafiestyvalu. Jaho asnoŭnaja častka zdymałasia paśla vybaraŭ u žniŭni
Bierlinski kinafiestyval, što hetym razam raździelicca na dźvie častki i projdzie ŭ sakaviku i červieni, abviaściŭ prahramu. U adnu ź jaho hałoŭnych siekcyj, Berlinale Special, jakuju asabista adbiraje dyrektar fiestyvalu Karła Šatryjan, trapiŭ dakumientalny film Alaksieja Pałujana «Kuraž». Karcina pakazvaje ŭ tym liku biełaruskija padziei žniŭnia.
«Kuraž» raskazvaje historyi troch biełaruskich akcioraŭ i demanstruje, što značyć być niezaležnym «mastakom» va ŭmovach biełaruskaj dyktatury. Svaich hierojaŭ Alaksiej Pałujan zdymaŭ ciaham troch hadoŭ, ale padziei žniŭnia ŭ vyniku zaniali asnoŭnuju častku paŭtarahadzinnaha filma. Z apierataram jany zaśpieli Stełu 9 žniŭnia, Puškinskuju 10 žniŭnia, vychad viaźniaŭ z Akreścina dy inšaje — hrupa pracavała kožny dzień da kanca miesiaca.
Karcina zdymałasia ŭ Biełarusi i amal całkam biełaruskaj kamandaj, ale finansavańnie prajekta — vyklučna niamieckaje.
Režysior Alaksiej Pałujan — biełarus, jaki žyvie ŭ Hiermanii, — viadomy karotkamietražnym filmam «Voziera radaści» pavodle adnajmiennaha ramana Viktara Marcinoviča. Stužka pabyvała na siamidziesiaci kinafiestyvalach, atrymała kala tryccaci ŭznaharod i ŭ adpaviednaj naminacyi była kvalifikavana na premiju «Oskar», praŭda, u šort-list nie trapiła.
Bierlinski kinafiestyval — adzin z hałoŭnych kinafiestyvalaŭ śvietu, sioleta projdzie jaho 71-ja edycyja.