Źjaviŭsia rejtynh najlepšych i najhoršych pašpartoŭ dla padarožžaŭ
Pačynajučy z 2006 hoda, arhanizacyja Henley & Partners štohod stvaraje rejtynh najlepšych pašpartoŭ dla padarožžaŭ. Kryteryj acenki — toje, kolki krain uładalnik pašparta moža naviedać biez atrymańnia vizy. Pry hetym rejtynh nie ŭličvaje časovyja abmiežavańni ŭ padarožžach, źviazanyja, naprykład, z kavidnym łakdaŭnam.
Fota pixabay.com.
Sioleta na vierchnim radku rejtynhu apynułasia Japonija.
Uładalniki pašpartoŭ hetaj krainy mohuć naviedvać 193 punkty naznačeńnia bieź vizy abo atrymoŭvać vizu paśla pryjezdu ŭ krainu. Ale ž na samoj spravie, u suviazi z kavidnymi abmiežavańniami, ciapier hramadzianie Japonii majuć dostup tolki mienš čym da 80 nakirunkaŭ, piša CNN.
Na druhim miescy rejtynhu znachodzicca Sinhapur — pašpart hetaj krainy dazvalaje naviedać 192 nakirunki. Treciaje miesca padzialajuć Paŭdniovaja Kareja i Hiermanija z 191 biaźvizavym punktam naznačeńnia. Ale realnaść i tut unosić svaje karektyvy. Naprykład, uładalniki sinhapurskich pašpartoŭ zaraz mohuć naviedać mienš za 75 nakirunkaŭ.
Navat hramadzianie krain, dzie prachodzić paśpiachovaja kampanija supraćkavidnaj vakcynacyi, majuć ciažkaści z padarožžami. Tearetyčna ŭładalniki brytanskich i amierykanskich pašpartoŭ mohuć naviedać 187 punktaŭ naznačeńnia va ŭsim śviecie, ale ŭ realnaści hetaja ličba składaje mienš za 60 nakirunkaŭ dla brytancaŭ i adpaviedna 61 nakirunak dla hramadzian ZŠA.
Što datyčycca astatnich lidaraŭ rejtynhu, bolšaja častka pieršaj dziasiatki — krainy ES. Čaćviortaje miesca ŭ śpisie padzialajuć Finlandyja, Italija, Luksiemburh i Ispanija, piataje — Aŭstryja i Danija. Na šostym mieście znachodziacca Francyja, Irłandyja, Niderłandy, Partuhalija i Šviecyja.
Biełaruski pašpart zaniaŭ u rejtynhu 73 miesca z 77 biaźvizavymi nakirunkami dla padarožžaŭ.
Varta adznačyć, što heta adzin z najhoršych pakazalnikaŭ za apošnija hady dla našaj krainy. Nižej u rejtynhu Biełaruś apuskałasia tolki ŭ 2011-2012 hadach (74 miesca) i ŭ 2015 hodzie (78 miesca). Što datyčycca bolš vysokich pazicyj, najlepšyja pakazalniki za apošni čas byli ŭ Biełarusi ŭ pieryjad z 2007 pa 2009 hady, kali kraina zajmała 63 miesca.
