«Ad spryntarki da voraha dziaržavy». Što pišuć zachodnija ŚMI pra skandał ź Cimanoŭskaj?
Paśla čarhovaha mižnarodnaha skandału Biełaruś znoŭ apynułasia ŭ centry ŭvahi zachodnich ŚMI. Pahladzieli, što pišuć viadučyja suśvietnyja vydańni pra situacyju z Kryścinaj Cimanoŭskaj.
Fota The Reuters
Sproba vyvieźci Kryścinu Cimanoŭskuju suprać jaje voli z Tokia ŭ Biełaruś pryciahnuła ŭvahu ŭsiaho śvietu. Za losam spartsmienki sočać samyja papularnyja i aŭtarytetnyja vydańni.
U viadučym niamieckim vydańni Die Zeit vyjšaŭ artykuł pad nazvaj «Ad spryntarki da voraha dziaržavy». Vydańnie padkreślivaje, što ŭ videa Cimanoŭskaj, dzie spartsmienka ŭkazvaje na pamyłki, dapuščanyja biełaruskim spartyŭnym kiraŭnictvam, niama nijakich palityčnych zajaŭ. Cimanoŭskaja nie krytykavała režym Łukašenki i nie vykazvała salidarnaść z demakratyčnym rucham, jaki padaŭlaje biełaruski ŭrad, — «nijakich palityčnych žestaŭ ci apazicyjnych simvałaŭ».
Tym nie mienš, jak adznačyŭ trenier Cimanoŭskaj u asabistaj hutarcy ź joj, jaje los vyrašaŭsia «źvierchu». Jak piša vydańnie, heta pakazvaje, nakolki radykalizavaŭsia režym Alaksandra Łukašenki — «ciapier jon ćviorda hatovy padavić luboje inšadumstva, lubuju krytyku, luboje piarečańnie». Krytyka 24-hadovaj Kryściny Cimanoŭskaj mieła vyklučna spartyŭny charaktar, ale dla biełaruskaj prapahandy jana adrazu ž stała voraham dziaržavy.
«Represiŭny režym Alaksandra Łukašenki praz hod paśla pačatku palityčnaha kryzisu staŭ nastolki ślapym i paranoidnym, što lubuju krytyku biełaruskija ŭłady ciapier źviazvajuć z palitykaj», — piša Die Zeit.
Vydańnie CNN adznačaje, što padčas chałodnaj vajny mnohija spartsmieny karystalisia mahčymaściu ŭciačy z Savieckaha Sajuza padčas bujnych mižnarodnych spartyŭnych spabornictvaŭ. Paśla raspadu SSSR takija vypadki stali redkimi, ale, jak pakazała situacyja z Kryścinaj Cimanoŭskaj, usio ž taki byvajuć.
CNN piša, što vypadak ź biełaruskaj spartsmienkaj vyklučny, bo Kryścina Cimanoŭskaja vymušanaja prasić prytułku ŭ inšych krainach nie pa palityčnych pryčynach, a praz krytyku kiraŭnictva. Biełaruskija treniery ŭklučyli spartsmienku ŭ honku, u jakoj Cimanoŭskaja nikoli nie ŭdzielničała. Da taho ž, nie paviedamili pra heta samoj spartsmiency.
Jak piša The New York Times, mnohija pravaabaroncy rasceńvajuć incydent ź Cimanoŭskaj jak parušeńnie jaje pravoŭ. Vydańnie adznačaje, što ŭ Japonii niama surjoznych palityčnych adnosin ź Biełaruśsiu. «U Japonii niama pryčyn stavić dypłamatyčnuju paviestku dnia vyšej za pravy Kryściny Cimanoŭskaj», — śćviardžaje były japonski dypłamat Kadzuchika Toha.
«Prymusovaje adchileńnie Cimanoŭskaj ad udziełu ŭ Alimpijskich hulniach stała jašče adnym hučnym incydentam, jaki pryviadzie da taho, što Biełaruś stanie jašče bolš izalavanaj na mižnarodnym uzroŭni», — piša vydańnie The New York Times.
Aŭtarytetnaje brytanskaje vydańnie The Guardian śćviardžaje, što incydent ź Cimanoŭskaj pakazvaje, jak uzmacnieńnie kantrolu Alaksandra Łukašenki nad biełaruskim hramadstvam pierakinułasia na sport. «Hetyja padziei nahadvajuć hučnyja vypadki ŭciokaŭ savieckich spartsmienaŭ padčas chałodnaj vajny, ale ničoha nie ŭkazvała na toje, što Cimanoŭskaja nie chacieła viartacca ŭ Biełaruś paśla Alimpijskich hulniaŭ», — adznačaje The Guardian.
Jak piša vydańnie Die Welt, niamiecki ŭrad zaklikaje biełaruskija ŭłady pavažać pravy Cimanoŭskaj. «My asudžajem pieraśled i zapałochvańnie hramadzian», — zajaviła pres-sakratarka Ministerstva zamiežnych spraŭ Niamieččyny.
Reuters adznačaje, što incydent ź biełaruskaj spartsmienkaj vyklikaŭ rezanans u mižnarodnaj supolnaści. «Japonskija ŭłady, a taksama MAK pavinny surjozna adnieścisia da situacyi z Kryścinaj Cimanoŭskaj i praciahvać jaje achoŭvać i padtrymlivać. Japonski ŭrad pavinien zrabić usio mahčymaje, kab harantavać, što spartsmienku nie vyviezuć u Biełaruś suprać jaje voli, a siamja Cimanoŭskaj nie budzie padviarhacca represijam», — zaklikaje pradstaŭnik arhanizacyi Human Rights Watch u Tokia Tapej Kasai.
