Dziaržpahrankamitet Biełarusi zajaviŭ, što ŭkrainskija piłoty parušyli miažu, i pakazaŭ videa. Ukraina abviarhaje
U subotu 4 śniežnia Dziaržpahrankamitet Biełarusi paviedamiŭ, što padčas vučeńniaŭ, jakija Ukraina pravodziła na miažy ź Biełaruśsiu, adbyŭsia incydent.
«Kala 12-j hadziny na biełaruska-ŭkrainskaj miažy ŭ rajonie punkta propusku «Novaja Rudnia» Mazyrskaha pahranatrada zafiksavana parušeńnie pavietranaj prastory Respubliki Biełaruś z boku Ukrainy. Ukrainski vajskovy viertalot Mi-8 na vyšyni kala 100 m pierasiok dziaržaŭnuju miažu i zalacieŭ na hłybiniu da 1 km na terytoryju Biełarusi», — skazana ŭ paviedamleńni viedamstva, da jakoha taksama prymacavana videa.
Ukraina pra «parušeńnie miažy» ź Biełaruśsiu: pierasiačeńnia nie było
U toj ža čas u kamientary «Ukrainskaj praŭdzie» pamočnik kiraŭnika Dziaržaŭnaj pamiežnaj słužby Ukrainy Andrej Dziemčanka nahadaŭ, što z 23 listapada na miažy ź Biełaruśsiu idzie Sumiesnaja śpiecyjalnaja pamiežnaja apieracyja «Paleśsie», u miežach jakoj prymianiajecca avijacyja i bieśpiłotniki, ale padkreśliŭ, što faktu pierasiačeńnia miažy ź Biełaruśsiu nie było.
«U achovie i manitorynhu miažy aktyŭna vykarystoŭvajecca avijacyja, adnak toje, što zajaviŭ siońnia biełaruski bok pra parušeńnie pavietranaj prastory, nie adpaviadaje rečaisnaści», — skazaŭ jon.