Zatrymany stvaralnik jutub-kanała «Treci Rehijon Biełaruś» Aleh Kanavałaŭ. Jon na śviaty viarnuŭsia z Kijeva dadomu
Aleh Kanavałaŭ u 2020 hodzie pierajechaŭ va Ukrainu. Na navahodnija śviaty jon pryjechaŭ u Biełaruś, dzie i byŭ zatrymany.
«Ustanoŭlena, što ź leta 2020 hoda mužčyna aktyŭna ŭdzielničaŭ u pratestnym ruchu, zdymaŭ i raźmiaščaŭ videa na svaim kanale, deanoniŭ siłavikoŭ. Za parušeńnie paradku arhanizacyi abo praviadzieńnia masavych mierapryjemstvaŭ nieadnarazova pryciahvaŭsia da administracyjnaj adkaznaści», — havorycca ŭ paviedamleńni MUS.
U viedamstvie zajavili, što Kanavałaŭ źbieh va Ukrainu, ale źjaŭlajučysia «stvaralnikam i administrataram YouTube-kanała z ekstremisckim źmiestam», praciahvaŭ raźmiaščać «infarmacyju antydziaržaŭnaha kštałtu».
Tam taksama zaznačyli, što padčas apieratyŭnych mierapryjemstvaŭ jaho zatrymali na terytoryi Biełarusi.
Papiarednie, suprać mužčyny raspačali kryminalnuju spravu za raspalvańnie sacyjalnaj varožaści.
