Rychtujecca vychad «Karotkaj historyi Biełarusi» Alesia Kraŭceviča. Nakład abmiežavany zamovami
Žurnalist Hleb Łabadzienka paviedamiŭ u Facebook pra toje, što pačynajecca padpiska na ŭnikalnuju knihu prafiesara Alesia Kraŭceviča «Karotkaja historyja Biełarusi».
«Hałoŭnaja meta knihi, kab pračytaŭšy 120 staronak i prahladzieŭšy 156 ilustracyj, luby biełarus zmoh uciamna i łahična za 10 chvilin pierakazać našu vialikuju i słaŭnuju historyju, nie zadumvajučysia, skazać, chto my i adkul my»,
— zaznačaje Łabadzienka.
Pavodle jaho,
«novaja kniha Alesia Kraŭceviča prosta i łahična raskładaje ŭsio pa paličkach. Kniha pačynajecca tym, što pieršyja ludzi źjavilisia na terytoryi Biełarusi kala 300 tysiač hadoŭ tamu, a zakančvajecca atrymańniem niezaležnaści Respublikaj Biełaruś. Najnoŭšaja historyja ŭ knizie admysłova nie zakranajecca, bo jana pišacca na našych vačach».
Atrymać knihu možna tolki aformiŭšy papiaredniuju padpisku. Dla hetaha treba napisać elektronny list na adras [email protected]. Padrabiaznaści vydaŭcy dašluć listom u adkaz.
Vychad knihi płanujecca na krasavik-maj. Na ciapierašni momant užo zakančvajecca viorstka knihi.
