Biełaruskija spartoŭcy razam vystupili suprać vajny. Chto padpisaŭ zvarot?
Biełaruski fond spartovaj salidarnaści (BFSS) pradstaviŭ antyvajennuju dekłaracyju spartsmiena. Raźbirajemsia, što heta za tekst i chto ŭžo pastaviŭ pad im svoj podpis.
Što napisana ŭ dekłaracyi
Hety antyvajenny tekst sfarmulavany ad imia mižnarodnaj spartovaj supolnaści. Padpisanty dekłaracyi vystupajuć za nieadkładnaje spynieńnie vajny va Ukrainie, raźviazanaj Rasijaj, i padkreślivajuć, što vajna viadziecca z vykarystańniem terytoryi Biełarusi i rasijskija vojski pavinny być vyviedzienyja i adtul, a nie tolki z Ukrainy.
Jany adznačajuć, što padčas vajny va Ukrainie mieli miesca mižnarodnyja vajennyja złačynstvy i złačynstvy suprać čałaviectva, i vystupajuć za mižnarodnaje rasśledavańnie hetych złačynstvaŭ i pryciahnieńnie vinavatych da adkaznaści.
Taksama aŭtary dekłaracyi pryznajuć niezaležnaść Ukrainy i jaje terytaryjalnuju cełasnaść u mižnarodna pryznanych miežach i vystupajuć za zachavańnie suvierenitetu Biełarusi.
Chto padpisaŭ
BFSS śćviardžaje, što za niekalki dzion kolkaść padpisantaŭ lista pieravysiła sto čałaviek, ale ž bolšaść imion pakul što prachodzić vieryfikacyju. Siarod 48 imionaŭ, jakija viadomyja na siońnia, bolšaść składajuć pradstaŭniki biełaruskaha i ŭkrainskaha sportu.
Samyja znakamityja ź biełarusaŭ-padpisantaŭ dekłaracyi:
- lehiendarny futbalist i były trenier kijeŭskaha «Dynama» Alaksandr Chackievič;
- napadajučy polskaha «Rakuva» i adzin z najlepšych biełaruskich futbalistaŭ apošnich hadoŭ Illa Škuryn;
- srebrany pryzior Alimpijady-2008 mnahaborac Andrej Kraŭčanka;
- hałoŭny trenier futbolnaha «Lvova» Aleh Dułub;
- znakamity łyžnik Siarhiej Dalidovič;
- pieramožca Kubka śvietu pa kikboksinhu Ivan Hanin;
- viadomaja lohkaatletka i pryziorka Alimpijady-2008 Nadzieja Astapčuk;
- tajbaksior Vital Hurkoŭ;
- i inšyja biełaruskija spartoŭcy, a taksama mieniedžary i žurnalisty.
List taksama padpisali 11 ukrainskich spartoŭcaŭ. Adznačym čempijona śvietu i Jeŭropy pa dziudo Hieorhija Zantaryju, lepšaha bambardzira ŭ historyi futbolnych čempijanataŭ Ukrainy Maksima Šackich, finalista Lihi Jeŭropy i ŭładalnika Kubka UEFA Jaŭhiena Sielaźniova. Jość u śpisie i adno jeŭrapiejskaje imia — Bieńjamin Vierbič, słavienski futbalist, paŭabaronca kijeŭskaha «Dynama» i słavienskaj nacyjanalnaj zbornaj.
Što vyjdzie z hetaha dakumienta
Vykanaŭčy dyrektar BFSS Alaksandr Apiejkin paviedamlaŭ pra raspracoŭku dekłaracyi jašče za niekalki tydniaŭ da jaje apublikavańnia. Apiejkin adznačaŭ, što va ŭmovach, kali biełaruski sport abkładzieny sankcyjami praz vajnu va Ukrainie, važnym robicca pytańnie pra dopusk biełaruskich spartsmienaŭ da mižnarodnych spabornictvaŭ.
«Usich biełaruskich spartsmienaŭ asacyjujuć z režymam Łukašenki. Heta niapravilna. Jość tyja, chto paciarpieŭ za svaje pohlady, byŭ vymušany pakinuć krainu», — razvažaŭ Apiejkin. Jon płanavaŭ, što padpisańnie dekłaracyi stanie padstavaj, kab Fond spartovaj salidarnaści vystupiŭ za dopusk spartsmiena da spabornictvaŭ u niejtralnym statusie, to-bok podpis atleta pad listom zaśviedčyŭ by jaho staŭleńnie da vajny va Ukrainie i adpaviedna nieabhruntavanaść sankcyj adnosna hetaha atleta.
U vyniku ŭ čałavieka pavinien źjavicca vybar: adkryta padpisać dekłaracyju i, mahčyma, atrymać šans praciahnuć karjeru, ci pramaŭčać i zastacca na svaich pazicyjach u biełaruskim sporcie, ale akazacca biez dostupu da mižnarodnych startaŭ.
Nie samy prosty vybar dla dziejnych biełaruskich spartoŭcaŭ.
«Našu Nivu» finansujuć jaje čytačy — padtrymać prosta
Čytajcie taksama:
Biełarus zhulaje za zbornuju Hiermanii na čempijanacie śvietu pa chakiei
