Byłoha palitviaźnia z ankałahičnaj chvarobaj pazbavili 2-j hrupy invalidnaści
Žychar Homiela Alaksiej Ramanaŭ adbyŭ hod pakarańnia ŭ kałonii za «abrazu Łukašenki». Jon mieŭ druhuju hrupu invalidnaści pa ankałohii. Padčas źniavoleńnia ŭ jaho znajšli novuju puchlinu. Ciapier, pa vyzvaleńni, jaho pazbavili 2-j hrupy, piša Radyjo Svaboda.
«16 traŭnia była ŭ mianie płanavaja miedyčnaja reabilitacyjnaja ekśpiertnaja kamisija, MREK. I zabrali druhuju hrupu — dali treciuju! Ja spytaŭsia ŭ lekarki: «U mianie što — sielazionka adrasła, jakuju vyrazali, try čverci padstraŭnikavaj załozy, častka straŭnika i kišečnika?» Jana kaža, što nie, stan moj — siaredniaj ciažkaści, ale hrupu zabrała. Na majo abureńnie adkazała, kab skardziŭsia ŭ vyšejšyja instancyi», — raskazaŭ były palitviazień.
Majučy druhuju hrupu, jon atrymlivaŭ piensiju — 278 rubloŭ.
«I hetych hrošaj ni na što, kaniečnie, nie chapała. Bo ŭ sakaviku ja na leki addaŭ 150 rubloŭ. Vyžyvaju dziakujučy žoncy i nieabyjakavym biełarusam», — kaža Alaksiej.
Taksama druhaja hrupa dazvalała jamu mieć biaspłatny prajezd, sanatoryj — raz na hod, i biełaruskija leki sa źnižkaj 90%.
Z treciaj hrupaj jon budzie mieć prykładna 220 rubloŭ piensii, 50% źnižki na biełaruskija leki. «I ŭsio na hetym», — kaža Alaksiej.
«Ja ŭžo treci raz prachodziŭ MREK. Adna kamisija była ŭ kałonii. I navat tam mnie pakinuli druhuju hrupu i zapeŭnili, što nichto jaje nie zabiare pry ankałohii. Bo što źmianiłasia ŭ mianie ŭ lepšy bok? Zrok sieŭ, pankreatyt chraničny nažyŭ, pakutuju ad bolu, za hod dziesiać razoŭ traplaŭ u špital. Na kamisii siońnia zaŭvažyŭ, što nie tolki ŭ mianie zabrali hrupu. Takoje adčuvańnie, što takim čynam «pazbaŭlajucca» invalidaŭ, jakija nibyta «vyzdaravieli», — razvažaje były palitviazień.
Jon kaža, što z takim stanam zdaroŭja nie znojdzie pracy ŭ Homieli. «Bo nijakaj pracy tut niama. Ja pracavaŭ na budoŭli raniej. A ciapier u mianie niama sił i zdaroŭja niešta ciahać, padymać. Prosta pastavili mianie na miažu vyžyvańnia», — dadaŭ Alaksiej.
Jon napisaŭ zajavu na abskardžańnie rašeńnia MREK. Ale nie vieryć, što heta daść plon.
Ankałahičnaje zachvorvańnie ŭ jaho vyjavili ŭviesnu 2020 hoda. Praviali składanuju apieracyju, vydalili sielazionku, častku straŭnika, kišečnika, padstraŭnikavaj załozy, bo puchlina dała mietastazy.
