Rasijskaha himnasta, jaki vyjšaŭ ź litaraj Z na majcy, dyskvalifikavali na hod
Mižnarodnaja fiederacyja himnastyki (FIG) na hod dyskvalifikavała rasijskaha himnasta Ivana Kulaka, jaki padčas etapu Kubka śvietu ŭ horadzie Docha ŭ sakaviku hetaha hoda źjaviŭsia na cyrymonii ŭznaharodžańnia ŭ spartyŭnaj formie ź litaraj Z, jakaja stała simvałam vajny Rasii suprać Ukrainy, paviedamlaje «Bi-bi-si».
Fota: topspb.tv
Kulak zavajavaŭ bronzu ŭ finale turniru pa paralelnych brusach, pry hetym zołata ŭ hetaj katehoryi atrymaŭ spartsmien z Ukrainy Illa Koŭtun. Padčas uručeńnia miedaloŭ Kulak stajaŭ pobač ź im.
Paśla hetaha FIG pačała rasśledavańnie, u vyniku jakoha pryniała pastanovu zabaranić Kulaku vystupu na hod. Praz vajnu rasijskija himnasty i tak pazbaŭlenyja prava vystupać na mižnarodnych turnirach, jakija pravodziacca pad ehidaj FIG.
Tamu ŭ zajavie Fiederacyi skazana: «Kali achoŭnyja miery, jakija zabaraniajuć rasijskim atletam vystupać, usio jašče buduć dziejničać 17 maja 2023 hoda, dyskvalifikacyja budzie praciahvacca i skončycca praz šeść miesiacaŭ paśla skasavańnia vyšejzhadanych zachadaŭ».
20-hadovy Kulak taksama pavinien viarnuć pryzavyja hrošy ŭ pamiery 500 šviejcarskich frankaŭ (kala 500 dalaraŭ ZŠA) i pakryć častku sudovych vydatkaŭ na sumu 2 tys. šviejcarskich frankaŭ.
Pry hetym FIG paličyła, što kiraŭnik rasijskaj delehacyi na turniry Valancina Radzivonienka i trenier Ihar Kałabuškin praviły Fiederacyi nie parušyli.
