Palitviaźnia asudzili da 4,5 hoda kałonii za dapamohu biełarusam evakujavacca ad pieraśledu ŭ Litvu
Sud Ščučynskaha rajona 31 maja asudziŭ 30-hadovaha palitźniavolenaha Jaŭhiena Bujnickaha da čatyroch z pałovaj hadoŭ uzmocnienaha režymu i štrafu ŭ 110 bazavych vieličyń (3 520 rubloŭ). Jaho pryznali vinavatym pa č. 3 art. 371 Kryminalnaha kodeksa — naŭmysnaje niezakonnaje pierasiačeńnie dziaržaŭnaj miažy Respubliki Biełaruś, ździejśnienaje arhanizavanaj hrupaj. Jon dapamahaŭ evakujavacca ź Biełarusi ludziam, jakija ratavalisia ad palityčna matyvavanaha pieraśledu ŭładaŭ. Niahledziačy na toje, što jaho sudzili za ździajśnieńnie ŭčynku hrupaj asobaŭ, na łavie padsudnych byŭ adzin Jaŭhien. Pavodle abvinavačvańnia, jon padvoziŭ ludziej u pamiežnuju zonu ź Litvoj. Sudździa Dźmitryj Cyvunčyk pačaŭ razhladać spravu jašče 5 krasavika, ale ahučyŭ prysud tolki ŭčora, paviedamlaje «Viasna».
Jaŭhien Bujnicki byŭ zatrymany 5 žniŭnia minułaha hoda. Praź miesiac Śledčy kamitet zajaviŭ, što viedamstva rasśleduje kryminalnuju spravu ab niezakonnym pierasiačeńni dziaržaŭnaj miažy Respubliki Biełaruś
«Pa najaŭnych u śledstva danych, šerah asob, abjadnaŭšysia va ŭstojlivuju hrupu, na praciahu jak minimum apošnich vaśmi miesiacaŭ ažyćciaŭlali niezakonnuju pierapraŭku biełaruskich hramadzian na terytoryju Litoŭskaj Respubliki.
Ustanoŭlena, što adnym z arhanizataraŭ i kiraŭnikoŭ złačynnaj hrupy źjaŭlajecca hramadzianka Respubliki Biełaruś Natalla Kalehava, jakaja pastajanna pražyvaje ŭ Litvie, — kiraŭnica arhanizacyi «Dapamoha». Ustanoŭlenyja i zatrymanyja asoby, jakija ažyćciaŭlajuć złačynnuju dziejnaść na terytoryi Biełarusi, u tym liku niepasrednuju dastaŭku ludziej da linii dziaržaŭnaj miažy».
Na dziaržaŭnym telebačańni vyjšaŭ videasiužet «Skrynia Pandory»: biznes na mihrantach. Jak ułady Litvy vykarystoŭvajuć uciekačoŭ u svaich palityčnych metach», dzie raspaviadajecca pra hetuju spravu. Niahledziačy na toje, što SK śćviardžaŭ, što zatrymanyja niekalki čałaviek, jakija dziejničali na biełaruskim baku, u filmie pakazali adzinaha zatrymanaha pa spravie — Jaŭhiena Bujnickaha. Jaho nazyvajuć «kurjeram, jaki pryvoziŭ ludziej da miažy — u pamiežnuju zonu». U filmie śćviardžajecca, što jon «atrymlivaŭ płatu» za heta, u čym pryznaŭsia śledčamu: «Mnie zapłacili… Zapravili mašynu».
U videasiužecie Jaŭhien raspaviadaje:
«Ja pieravoziŭ u ahulnaj kolkaści piać čałaviek, jakija pakinuli maju mašynu kala pasiołka Pieršamajsk z namieram pakinuć Respubliku Biełaruś šlacham niezakonnaha pierasiačeńnia miažy. Pra toje, što jany płanujuć pierasiekčy litoŭskuju miažu, adkryta heta, moža być, i nie było skazana, ale heta ŭśviedamlałasia, to bok ja heta ŭśviedamlaju».
Sudzili Jaŭhiena adnaho, ale padrabiaznaści z suda nieviadomyja.
Jaŭhien skončyŭ histaryčny fakultet BDU. Jon piša vieršy i sprabuje malavać. U listavańni palitviazień biełaruskamoŭny. Za kratami Jaŭhien adznačyŭ svajo 30-hodździe. Jon chutka budzie etapavany ź IČU Ščučyna ŭ hrodzienskuju turmu, dzie budzie čakać razhladu apielacyjnaj skarhi na prysud.
Padtrymajcie palitviaźnia listami salidarnaści, a taksama hrašovymi pieravodami i pasyłkami:
Jaŭhien Uładzimiravič Bujnicki,
turma №1, 230023, h. Hrodna, vuł. Kirava, 1.
