ŚMI: U Branskaj vobłaści sprabavali padarvać naftapravod «Družba»
Ranicaj 11 červienia niedaloka ad pasiołka Huloŭka (heta za 40 km da miažy z Ukrainaj) prahrymieli try vybuchi, paviedamlaje tielehram-kanał Baza. Tady ž spracavaŭ sihnał ab stracie suviazi z zasaŭkaj trubapravoda «Družba», jaki prachodzić u hetych miaścinach.
Zdymak ilustracyjny. Fota: RIA Novosti
Pa papiarednich źviestkach, spracavali biezabałonkavyja vybuchovyja pryłady.
«Adnym z vybuchaŭ była paškodžanaja transfarmatarnaja padstancyja z enierhabłokam zasaŭki naftapravoda. Jašče adzin vybuch adbyŭsia ŭ miescy, dzie prakładzieny kabiel — tam zastałasia varonka 40 na 20 sm. Treci vybuch paškodziŭ supraćpadkopnuju trubu (dadatkovy srodak abarony, jaki zakopvajuć u ziamlu na režymnych abjektach), pakinuŭšy varonku 40 na 60 santymietraŭ», — piša Baza.
Sam trubapravod «Družba» ŭ vyniku nie paciarpieŭ, adnak supraćpadkopnaja truba i padstancyja paškodžanyja. Taksama byŭ abiastočany enierhabłok kiravańnia zasaŭkaj. Raźlivu naftapraduktaŭ udałosia paźbiehnuć.
Z 24 lutaha trubapravod zakansiervavany, ale ŭsiaredzinie ŭ jaho znachodzicca dyzielnaje paliva.
Aficyjnych kamientaroŭ z hetaj nahody pakul nie było. Rasijskaja «Transnafta» zajaviła tolki, što naftapravod «Družba» pracuje ŭ štatnym režymie, prapampoŭka nafty ŭ Jeŭropu idzie pa hrafiku pa abiedźviuch halinach trubapravoda.
