Pad Charkavam prapali dva amierykanskija dobraachvotniki
Dvoje hramadzian ZŠA, jakija vajujuć va Ukrainie na baku USU, źnikli pad Charkavam prykładna tydzień tamu i nie vychodziać na suviaź. Jość padazreńni, što jany patrapili ŭ pałon, paviedamlaje CNN.
39-hadovy Alaksandr Drukie i 27-hadovy Endzi Chjun byli ŭ składzie 92-j miechanizavanaj bryhady USU i źnikli padčas boju kala Źbickaha pad Charkavam 9 červienia. Ich pošuki ni da čaho nie pryviali.
Hrupa Task Force Baguettie, jakaja składajecca z zamiežnych dobraachvotnikaŭ, jakija vajujuć na baku USU, zajaviła, što dvuch amierykancaŭ uziali ŭ pałon rasijskija vojski.
«Z taho času my ničoha pra ich nie čuli. Infarmacyja była paćvierdžanaja ŭkrainskaj vyviedkaj», — havorycca ŭ paviedamleńni hrupy.
Ale samoha momantu zachopu ŭ pałon nichto na svaje vočy nie bačyŭ.
Pres-sakratar Dziarždepartamienta ZŠA Nied Prajs zajaviŭ, što ZŠA ŭ kursie «niepaćvierdžanych paviedamleńniaŭ ab uziaćci ŭ pałon dvuch hramadzian ZŠA».
«My ŭvažliva sočym za situacyjaj i znachodzimsia ŭ kantakcie z ukrainskimi ŭładami. My ŭstrymajemsia ad dalejšych kamientaroŭ ź mierkavańniaŭ pryvatnaści», — cytuje CNN Prajsa.
Viadoma, što Alaksandr Drukie rodam sa štata Ałabama. Pa słovach svajakoŭ, raniej jon słužyŭ u Iraku. Endzi Chjun naradziŭsia ŭ Kalifornii, słužyŭ u marskoj piachocie ZŠA.
Situacyja tym bolš tryvožnaja, što na minułym tydni troch uziatych u pałon zamiežnych bajcoŭ USU prysudzili da śmiarotnaha pakarańnia ŭ samaabvieščanaj «DNR». Ich abvinavacili ŭ najomnictvie i sprobach hvałtoŭnaha zachopu ŭłady.
