«Rasija nie vajuje z Ukrainaj, heta vyzvalenčaja vajna za niezaležnaść Rasii» — voś jak skanstrujavanaja novaja chłuśnia ANT
Biełaruskaja dziaržaŭnaja prapahanda stała kopijaj rasijskaj šavinistyčnaj. Voś, naprykład, što — i źviarnicie ŭvahu, jak — iłhaŭ u efiry ANT u pieradačy Marata Markava prafiesar MHIMO, člen prezidyuma Rady pa zamiežnaj i abaronnaj palitycy Rasii Andrej Biazrukaŭ.
«My nie vajujem z Ukrainaj»
Prafiesar MHIMO paŭtaryŭ psichałahičnuju ŭstanoŭku rasijskaj prapahandy: Rasija nie vajuje z Ukrainaj. A z kim ža?
«Heta nie vajna z Ukrainaj. Hetaj vajna na terytoryi bratniaha naroda, vajna z Zachadam. Heta vajna z elitami ZŠA i Vialikabrytanii», — skazaŭ Andrej Biazrukaŭ.
Takim čynam, jon całkam admaŭlaje Ukrainie ŭ subjektnaści, chacia i nazyvaje vajnu vajnoj.
Prafiesar dadaŭ:
«A dla nas heta vajna, pa sutnaści, vyzvalenčaja, za niezaležnaść. Heta vajna antykałanijalnaja».
Nasamreč, hetaja vajna źjaŭlajecca antykałanijalnaj i vyzvalenčaj tolki dla Ukrainy. Ničoha nie pahražała i nie pahražaje niezaležnaści Rasii — jadziernaj dziaržavie z druhoj pa sile armijaj śvietu i vielizarnymi zapasami pryrodnych resursaŭ. Nichto nie kałanizavaŭ i nie zachoplivaŭ rasijskich terytoryj. Naadvarot, heta sama Rasija pravodziła ahresiŭnuju zamiežnuju palityku i pierakrojvała miežy susiednich dziaržaŭ, parušajučy normy mižnarodnaha prava.
«My pieraškadžajem amierykancam»
Šmat Biazrukaŭ havaryŭ pra Amieryku.
«I voś tyja, chto im pieraškadžaje, ad indziejcaŭ da mieksikancaŭ, jakija pieryjadyčna źjaŭlajucca (časam vielmi karykaturnyja piersanažy abo ź jakich robiać karykaturnych piersanažaŭ), voś ź imi treba zmahacca. Ciapier my (ruskija — NN) stali tym piersanažam, jaki pieraškadžaje im žyć. Jany sprabujuć usich abjadnać, kab vybudavać hetuju sistemu suprać nas», — skazaŭ Andrej Biazrukaŭ.
Nasamreč, rasijskija prapahandysty ŭtryrujuć i značna pierabolšvajuć rolu Rasii ŭ śviadomaści jak zvyčajnych amierykancaŭ, tak i amierykanskich palitykaŭ. Z raspadam Savieckaha Sajuza, jak tolki Rasija pierastała być ekzistencyjalnaj pahrozaj dla zachodniaha śvietu, amal nichto na Zachadzie nie ŭsprymaŭ Rasiju jak voraha, nichto nie abjadnoŭvaŭsia suprać jaje i nie vybudoŭvaŭ suprać jaje nijakich «sistem». Bolš za toje, mnohija zachodnija dziaržavy imknulisia intehravać Rasiju ŭ hłabalnyja handlova-ekanamičnyja łancužki, kab praz ekanamičnaje supracoŭnictva nablizić jaje da siabie.
Rasija pačała ŭsprymacca jak pahroza tolki tady, kali jana pačała zamachvacca na suvierenitet susiednich dziaržaŭ, a taksama pravodzić varožyja dziejańni suprać zachodnich krain. Raźviazanaja vajna suprać Ukrainy stała apošniaj kroplaj ciarpieńnia.
«Elita ZŠA drabnieje pakul što. Dumaju, što na nastupnym cykle raźvićcia pryjduć da ŭłady bolš adekvatnyja ludzi. Ale ciapier jak raz u asobie ZŠA my majem elitu, što stareje, jakaja sprabuje vyrašać svaje ŭnutrypalityčnyja prablemy za košt adciahnieńnia ŭvahi svajho naroda, jaki padzieleny 50 na 50, za košt zamiežnaha voraha. Elita tam zasiedziełasia», — kaža rasijski ekśpiert pra ZŠA, chacia hetyja słovy bolš adpaviadajuć Rasii.
Heta ŭ Rasii, a nie ŭ Amierycy, užo bolš za 20 hadoŭ nie adbyvajecca ratacyi ŭłady. Pucin, jaki ŭžo zusim nie małady čałaviek (jamu 69 hadoŭ), vyrašaje ŭłasnyja ŭnutrypalityčnyja prablemy za košt raspalvańnia ŭnutry rasijskaha hramadstva impierskich, šavinistyčnych i revizijanisckich santymientaŭ u adnosinach da susiednich i zachodnich dziaržaŭ. I heta pry tym, što za bolš čym 20 hadoŭ svajho kiravańnia Pucin tak kardynalna i nie zdoleŭ palepšyć ekanamičnyja pakazčyki Rasii i padniać dachody rasijan. Adnosna paśpiachovymi možna nazvać tolki pieršyja hady jaho kiravańnia, adnak paśla impierskaha pavarotu, prykładna ad 2008 hoda, ekanomika Rasii praktyčna stahniruje, niahladziečy na vysokija ceny na naftu. Pamier ekanomiki za apošnija 14 hadoŭ praktyčna nie vyras. Dla paraŭnańnia: VUP Kitaja za toj ža pieryjad vyras u 4 razy, a ŭ ZŠA vyras prykładna na 50%.
U toj ža čas prafiesar MHIMO raskazvaje standartnuju mantru pra toje, što Amieryka ŭpadaje ŭ hłyboki kryzis.
«Chto b ciapier ni sieŭ na amierykanskaha mustanha, jaho skinuć. Tamu što mustanh kvoły, u jaho balić žyvot. Kali na jaho sadziacca, jon hetaha ciarpieć nie moža», — arhumientuje svaje dumki prafiesar.
Treba tolki paciarpieć
Jašče adna lubimaja zabava rasijskich i łukašenkaŭskich palitołahaŭ — štohod kazać pra toje, što śviet nikoli nie budzie raniejšy, što śviet uvachodzić u stadyju hłybokaha kryzisu i pierabudovy, paśla jakoha ŭsio budzie inačaj i Rasija ŭmacujecca. Treba prosta krychu paciarpieć i abjadnacca vakoł lidara. Pahuhlicie — jany štohod heta kažuć.
Niejkija padobnyja dumki vykazvaŭ i Biazrukaŭ.
«My ŭvachodzim u vielmi ciažki pieryjad. Hety pieryjad budzie doŭžycca hady, kali nie dziesiacihodździ. Heta pieryjad hłybokaj pierabudovy. I zaraz budzie vyznačacca, jakija ź dziaržaŭ razvalacca ŭ siłu ŭnutranych pryčyn, a jakija nie», — kaža prafiesar MHIMO.
Zvyčajna takija refleksii padvodziać da taho, što, pakolki, pieryjad vielmi ciažki, to zaraz patrebnyja tak zvanyja mocnyja lidary.
«Tolki mocnyja asoby mohuć rastłumačyć adnoj pałovie ludziej, što heta treba rabić, i prymusić inšuju pałovu, jakaja nie choča mabilizacyi. I tam, dzie hetych mocnych asob niama, atrymlivajecca kaša, navat u bahatych krainach, jak jeŭrapiejskija. Praź niekalki hadoŭ heta abierniecca adstavańniem, strataj pazicyj, unutranym palityčnym kryzisam i hetak dalej. I heta my ŭžo bačym», — skazaŭ Andrej Biazrukaŭ.
Pa viersii rasijskaha palitołaha, ludzi nierazumnyja, i biez «mocnych haspadarnikaŭ» ničoha sami rabić nie buduć. Heta tradycyjny tezis kramloŭskich ideołahaŭ.
«U Jeŭropie paśla de Hola, Šyraka, Miterana, Šrodera nie zastałosia tych palitykaŭ, jakija mohuć zajavić pra siabie jak pradstaŭniki suvierennaj dziaržavy. Heta ich prablema», — narakaje prafiesar.
Usie vykazvańni pra «źmienu epoch i pierafarmatavańnie» i «śviet nikoli nie budzie raniejšy», jakija paŭtarajucca hod za hodam, słužać tolki dla apraŭdańnia aŭtarytaryzmu i padtrymki antydemakratyčnych sił za jaje miežami.
My naš, my novy śviet zbudujem
I tut prafiesar MHIMO pierachodzić da abviaščeńnia miesijanskaj roli Rasii ŭ śviecie. Mienavita Rasija, na jahonuju dumku, budzie budavać novy śviet. U jakaści arhumienta prafiesar MHIMO pryvodzić dyjałoh ź indaniezijskim taksistam.
«Kali vy pryjazdžajecie ŭ inšuju krainu, siadajecie ŭ aeraporcie ŭ taksi, naprykład u Indaniezii, vas pytajucca adkul vy. Pačuŭšy adkaz «z Rasii», kažuć: «Pucin good». Tam niama hetaha padrychtavanaha asiarodździa nianaviści, jany spakojna da nas staviacca, bolš za toje — ź simpatyjaj», — skazaŭ Andrej Biazrukaŭ.
Prafiesar MHIMO śćviardžaje, što apošnija 30 hadoŭ Rasija žyła pad kałanijalnym pryhniotam Zachadu. Ale, pa-pieršaje, nijakaha kałanijalnaha pryhniotu nie było, Rasija była niezaležnaj dziaržavaj, mocnym i ŭpłyvovym hulcom na mižnarodnaj arenie. Pa-druhoje, bolšuju častku z hetych 30 hadoŭ Rasijaj kiravaŭ Pucin. Vychodzić, jon ciarpieŭ «kałanijalny pryhniot»?
«Hałoŭnaje, kab nie hadziŭ»
«Jość ludzi, jakija realna źjaŭlajucca zdradnikami, jakija asacyjavali siabie z hłabalnaj aliharchijaj, jakija byli tut albo namieśnikami hetaj kałanijalnaj administracyi, albo jaje pasłuhačami. Z hetymi ludźmi nam dakładna nie pa darozie. I jany nie viernucca, tamu što razumiejuć, što ich tut čakaje sud», — havoryć prafiesar MHIMO frazami sa stalinskich časoŭ.
Ale adrazu ž udakładniaje, što vorahi narodu i zdradniki tearetyčna mohuć viarnucca, zahładziŭšy vinu.
«Samaje hałoŭnaje, kab hety čałaviek nie hadziŭ. Kali čałaviek źjazdžaje i pačynaje nieści ŭsiakuju hadaść ab toj krainie, ź jakoj źjechaŭ, potym viartacca niejak nie kašerna. Tamu ty pavinien publična pryznacca, što nie mieŭ racyi, i paprasić prabačeńnia», — kaža prafiesar topavaha rasijskaha ŭniviersiteta.
Čamu ž vy takija biednyja?
«500 hadoŭ jany vajavali, krali dabro i hrošy za košt hvałtu, piractva, a potym chvalilisia hetym. Nam treba zrazumieć, što ŭ ich krynica hrošaj vyčarpałasia. I što im daviadziecca, jak nam ciapier, zarablać samim. My im bolš hrošaj prosta tak davać nie budziem. My nie kałanijalnaja dziaržava. I kali my ŭbačym, što my bahaciejšyja, čym jany, tady jany pryjduć da nas i buduć prasić, kab my da ich pryjšli», — skazaŭ Andrej Biazrukaŭ, apraŭdvajučysia, čamu Rasija takaja biednaja na fonie Zachadu.
Nasamreč, jeŭrapiejskija kałanijalnyja impieryi ŭžo daŭno demantavanyja. Bolš za toje, daloka nie ŭsie zachodnija dziaržavy mieli kałonii. Naprykład, u Finlandyi, Irłandyi ci Čechii, jak i ŭ bolšaści inšych krain, nie było nijakich kałonij, ale hetyja krainy žyvuć našmat lepš, čym Rasija. Nu i sama zaležnaść dabrabytu krainy ad jaje kałanijalnaha minułaha — vielmi sumnieŭnaja. Naprykład, u svoj čas adnu z samych mocnych i vialikich kałanijalnych impieryj pabudavała Partuhalija — pryčym utrymlivała jaje najdaŭžej, da 1975 hoda. Ale ŭ toj ža čas Partuhalija była i zastajecca samaj biednaj krainaj Zachodniaj Jeŭropy.
Nasamreč, sama siońniašniaja Rasija kudy bolš nahadvaje kałanijalnuju impieryju, čym sučasnyja zachodnija dziaržavy. Jana tak i nie stała sapraŭdnaj fiederacyjaj. Prosta rasijskija kałonii (ziemli karennych narodaŭ, bahatyja na pryrodnyja resursy) znachodziacca nie za moram, a na adnym kantyniencie ź mietrapolijaj.
A nam zastajecca nahadać, što Andrej Biazrukaŭ — heta adzin z tych samych biazdarnych rasijskich ahientaŭ, jakich aryštavali ŭ ZŠA razam z Hannaj Čepmen. Paśla abmienu špijonami jaho pracaŭładkavali ŭ MHIMO, i ciapier jon hastraluje pa rasijskaj pravincyi. I ŭ Minsk.
