Prezident Sierbii Alaksandr Vučyč zajaviŭ, što ŭłady krainy šukajuć alternatyvu rasijskaj nafcie
Sierbija šukaje alternatyvu rasijskaj nafcie. Pra heta Vučyč zajaviŭ u videazvarocie da žycharoŭ Sierbii, piša «Mieduza» sa spasyłkaj na Blic.
Uładzimir Pucin i Alaksandr Vučyč. Fota: AR
«Pa miery taho, jak vajna va Ukrainie nabiraje abaroty, situacyja ŭ śviecie stanovicca ŭsio bolš i bolš składanaj, asabliva z ulikam taho faktu, što rasijskija ŭzbrojenyja siły znachodziacca na ŭzdymie i bolš aktyŭna nastupajuć», — skazaŭ prezident Sierbii, padkreśliŭšy, što ŭłady krainy robiać usio mahčymaje dla zabieśpiačeńnia enierhabiaśpieki.
U pryvatnaści, zajaviŭ Vučyč, Sierbija šukaje alternatyvu rasijskaj nafty, jakuju z-za sankcyj ź listapadzie 2022 hoda nie zmoža impartavać.
Pavodle słoŭ prezidenta Sierbii, adno z pytańniaŭ, što treba vyrašyć, — jak transpartavać naftu. Ciapier, pavodle jaho, pastaŭki ŭ krainu iduć praz kampaniju NIS, doli ŭ jakoj naležać rasijanam. «Niekatoryja vytvorcy kažuć, što nie buduć supracoŭničać z kampanijami, dzie rasijanie źjaŭlajucca mažarytarnymi ŭłaśnikami, takimi jak NIS», — zajaviŭ jon.
Vučyč zapeŭniŭ, što ŭłady Sierbii zrobiać usio mahčymaje, kab stvaryć zapas enierhanośbitaŭ na asieńnie-zimovy pieryjad. Nieabchodnyja zapasy hazu, zajaviŭ jon, užo zabiaśpiečyŭ rasijski «Hazpram».
Alaksandr Vučyč adziny siarod lidaraŭ krain-čalcoŭ Jeŭraźviazu, chto paśla pačatku rasijskaha ŭvarvańnia va Ukrainu publična vystupaŭ suprać sankcyj u dačynieńni da RF.
