Treciaja chvala apracoŭki podpisaŭ: z MUS zvalniajuć supracoŭnikaŭ, čyje rodnyja padpisvalisia za Babaryku
Heta nie adpaviadaje nijakim navat łukašenkaŭskim zakonam, ale heta masava ažyćciaŭlajecca ŭ siłavych viedamstvach. U KDB heta ŭžo adbyłosia. Čarha prakuratury, SK i KDK napieradzie.
«Naša Niva» viedaje vypadak, kali zvalniajuć apieratyŭnika z vopytam pracy 17 hadoŭ. U 2020 hodzie jon pastaviŭ podpis za Babaryku, u demanstracyjach nie ŭdzielničaŭ. Jamu daviadziecca viarnuć 7500 padjomnych, vypłačanych pry zaklučeńni kantrakta.
Zvalniajuć taksama i tych, u kaho za alternatyŭnych kandydataŭ padpisvalisia svajaki — havorka pra blizkich svajakoŭ, «jakija znachodziacca pad upłyvam aficera abo sami mohuć na jaho ŭpłyvać», patłumačyŭ «Našaj Nivie» dziejny aficer.
«Kali jon nie moža kiravać navat žonkaj, jak jamu možna daviarać kiravać supracoŭnikami?» — pracytavali nam tłumačeńnie kadravika.
Jak nam viadoma, heta adbyvajecca ŭ ramkach «treciaj chvali» apracoŭki podpisaŭ, addadzienych za alternatyŭnych kandydataŭ u 2020-m.
«Saskačyć» udajecca, tolki kali jość pierakanaŭčy arhumient ab pamyłkovaści addadzienaha podpisa.
Anałahičnyja pracesy adbyvajucca i ŭ inšych siłavych viedamstvach.
Śpisy na zvalnieńnie spuskaje KDB. Časam łakalnamu kiraŭnictvu ŭdajecca damovicca sa śpiecsłužbaj, što «niama kamu pracavać, dazvolcie pakinuć da kanca kantrakta — zvolnim pa skančeńni praz hod», u nadziei, što praz hod historyja zabudziecca. Ale tak atrymlivajecca nie va ŭsich, a tolki ŭ tych, u kaho jość i sapraŭdnaje žadańnie prykryć supracoŭnika, i realny niekamplekt u atradzie.
