Znajšli miortvym jašče adnaho top-mieniedžara «Hazprama», užo piataha za hod
U katedžnym pasiołku Marskija Terasy pad Pieciarburham znojdziena cieła biznesmiena Juryja Voranava. Jon uznačalvaŭ kampaniju «Astra Šypinh», jakaja śpiecyjalizavałasia na padradach «Hazprama» ŭ Arktycy. Voranaŭ zahinuŭ ad strełu ŭ hałavu.
Juryj Voranaŭ. Fota: invest.gazprom.ru
Mužčyna lažaŭ u basiejnie z prastrelenaj hałavoj, a pobač palicejskija znajšli traŭmatyčny pistalet Grand Power.
Cikava, što heta ŭžo piataja ćmianaja śmierć bujnoha mieniedžara, źviazanaha z «Hazpramam», u hetym hodzie.
29 studzienia ŭ asabniaku elitnaha katedžnaha pasiołka Leninski Leninhradskaj vobłaści byŭ znojdzieny miortvym 60-hadovy kiraŭnik transpartnaj słužby kampanii «Hazpram-Inviest» Leanid Šulman.
25 lutaha ŭ tym ža pasiołku zahinuŭ 61-hadovy Alaksandr Ciulakoŭ — namieśnik hiendyrektara adzinaha raźlikovaha centra «Hazprama».
18 krasavika ŭ kvatery na Univiersiteckim praśpiekcie Maskvy byli znojdzienyja cieły byłoha vice-prezidenta «Hazprambanka» Uładzisłava Avajeva, a taksama jahonaj žonki i dački.
A praz dva dni, 20 krasavika, palicyja Ispanii vyjaviła na zaharadnaj dačy trup Siarhieja Pratasieni, namieśnik kiraŭnika savieta dyrektaraŭ kampanii «Navatek». Taksama była znojdziena miortvaj usia jahonaja siamja.
Va ŭsich vypadkach śledčyja bačać prykmiety samazabojstvaŭ, ale z-za masavaści źjavy ŭ mnohich uźnikajuć sumnievy ŭ hetym.
