U Rasii taksama jość «rejkavyja partyzany». Jany ładziać dyviersii na čyhuncy i padpalvajuć vajenkamaty
Z kanca lutaha ŭ ŚMI i sacsietkach źjavilisia paviedamleńni pra jak minimum 23 ataki na vajenkamaty ŭ roznych rehijonach Rasii, padličyła vydańnie The Insider. Z hetych 23 napadaŭ 20 byli padpałami — u asnoŭnym, z užyvańniem «kaktejlaŭ Mołatava». Niekatoryja z napadaŭ byli źniatyja na videa samimi ž padpalščykami. U minułym hodzie takich vypadkaŭ nie było. Taksama paśla pačatku vajny z Ukrainaj u Rasii pačaścilisia avaryi na čyhuncy.
Dyviersija na čyhunačnaj vietcy, jakaja viadzie da vajskovaj čaści. Rejki zamknionyja provadam dla taho, kab sihnalny tok nie detektavaŭ razmykańnia. Fota: BAAK
The Insider padličyŭ, što, pa paviedamleńniach u ŚMI, z sakavika pa červień u roznych rehijonach syšli z rejek 63 tavarnyja ciahniki. Heta amal u paŭtara raza bolš, čym za toj ža pieryjad minułaha hoda.
Avaryi zdaralisia ŭ asnoŭnym na zachadzie i paŭdniovym zachadzie Rasii, časam pobač z vajskovymi čaściami. Adzin z takich vypadkaŭ — paškodžańnie čyhunačnaha mosta ŭ pamiežnym rajonie Biełharadskaj vobłaści ŭ krasaviku.
U červieni časopis «RŽD-partnior» pisaŭ sa spasyłkaj na Dziaržčyhunnahlad, što bolš za 55% avaryj tavarnych ciahnikoŭ u apošnija čatyry miesiacy byli źviazanyja sa stanam čyhunačnych šlachoŭ. Ale pry hetym rasijskaja FSB jak minimum adnojčy adspravazdačyłasia ab zatrymańni ludziej, jakija nibyta rychtavali dyviersii na «abjekcie transpartnaj infrastruktury» ŭ Biełharadskaj vobłaści.
U mai tielehram-kanał «Ostorožno, novosti» biez spasyłak na krynicy napisaŭ, što FSB šukaje siabraŭ niejkaj «bajavoj arhanizacyi anarcha-kamunistaŭ», jakaja raspaviała ŭ telehramie pra dyviersiju na čyhuncy ŭ Padmaskoŭi. Siłaviki vyjechali na miesca i vyśvietlili, što chtości častkova raźvioŭ rejki na ŭčastku, jaki viadzie da vučebna-taktyčnaha centra 12-ha Hałoŭnaha ŭpraŭleńnia Minabarony, jakoje adkazvaje za jadziernuju zbroju.
The Insider vyśvietliŭ, što paśla pačatku vajny ludzi, jakija nazyvali siabie ŭdzielnikami «bajavoj arhanizacyi anarcha-kamunistaŭ» (BAAK), stali publikavać u telehramie instrukcyi ab tym, jak ładzić avaryi na čyhuncy, i raskazvali pra ŭłasnyja paśpiachovyja «apieracyi». Jany ŭziali na siabie adkaznaść nie tolki za dyviersii ź ciahnikami, ale i za padpały vajenkamataŭ, viežaŭ sotavaj suviazi dy aŭtamabilaŭ praŭładnych aktyvistaŭ.
The Insider piša, što BAAK stała «najbolš aktyŭnaj padryŭnoj «siłaj» u Rasii paśla pačatku vajny.
Čalcy BAAK, ź jakimi źviazaŭsia karespandent vydańnia, raspaviali, što arhanizacyja isnuje ŭžo niekalki hadoŭ, ale zajaviła pra siabie publična tolki paśla pačatku vajny.
Ideja z dyviersijami na čyhuncy ŭźnikła paśla pačatku «rejkavaj vajny» ŭ Biełarusi, zajavili surazmoŭcy The Insider. «Sabataž na čyhuncy — heta adnosna prosty ŭ vykanańni i vielmi efiektyŭny sposab nanieści straty armii praciŭnika. Pryčym ź minimalnaj ryzykaj dla cyvilnych asob, pry pravilnym vykanańni. <…> Usio heta moža surjozna asłabić uzbrojenyja siły Rasii i akazać upłyŭ na toje, jak chutka vajna spynicca», — zajavili ŭ BAAK.
Udzielnik arhanizacyi pa imieni Ivan raskazaŭ, što anarchiscki partyzanski ruch u Rasii decentralizavany. Pa źviestkach na krasavik, pa ŭsioj krainie dziejničali ad 20 da 40 jaho jačejek, śćviardžaje Ivan.
Udzielnikam «rejkavaj vajny» nie patrebnaja śpiecyjalnaja padrychtoŭka — dastatkova mietadyčak ad BAAK, śćviardžajuć u arhanizacyi.
Paśla pačatku vajny jana sprabuje źbirać danaty ŭ internecie i zapuściła tielehram-bot dla pryciahnieńnia novych udzielnikaŭ.
U dyviersijach udzielničajuć ludzi z roznaj ideałohijaj, raskazaŭ The Insider pradstaŭnik jačejki, jakaja ŭziała na siabie adkaznaść za padpał mašyny nižaharodskaj aktyvistki, što źbiraje achviaravańni dla rasijskaha vojska.
«Siarod nas jość jak anarchisty, tak i nacyjanalisty (ale apošnich mienš). U kožnaha svaja historyja. My — antysistemnaja arhanizacyja, u tonkaściach palityčnaha kiravańnia budziem raźbiracca paśla taho, jak režym ruchnie abo choć by asłabnie», — zajaviŭ jon.
