MZS Biełarusi: U Mikuliškach nie zarehistravana vajskovych pachavańniaŭ
Časovy pavierany ŭ spravach Polščy ŭ Biełarusi Marcin Vajciachoŭski siońnia byŭ vyklikany ŭ biełaruskaje MZS. Padstavaj stała nazvanaja «niematyvavanaja zaniepakojenaść polskaha boku situacyjaj ź miescam pablizu vioski Mikuliški Ašmianskaha rajona». U MZS ździŭlajucca, čamu jano nazyvajecca ŭ polskich ŚMI «brackaj mahiłaj polskich žaŭnieraŭ» i dalej vykładajuć aficyjny pohlad režymu, jakoje musić być staŭleńnie da histaryčnaj pamiaci i nazyvajučy toje, što zrabili z pachavańniami ŭ Mikuliškach «nie tolki dziaržaŭnaj palitykaj, ale i chryścijanskim, čałaviečym padychodam samich biełarusaŭ».
Vajciachoŭskamu paviedamili, što
«pa infarmacyi miascovych orhanaŭ ułady, na terytoryi dadzienaha nasielenaha punkta vajskovych pachavańniaŭ i pachavańniaŭ zamiežnych vajskoŭcaŭ nie zarehistravana».
Zakonnaść praviadzieńnia «rabot pa ŭładkavańni terytoryi» paćvierdžanaja, pavodle śćviardžeńnia MZS, takim aŭtarytetnym u spravach zachavańnia histaryčnaj pamiaci orhanam, jak Hienieralnaja prakuratura i «hruntujecca na atrymańni źviestak ab adsutnaści čałaviečych pareštkaŭ i inšych faktaraŭ, jakija b tamu pieraškadžali».
Respublika Biełaruś, maŭlaŭ, «z asablivym trymcieńniem stavicca da ŭsich pachavańniaŭ, raźmieščanych na našaj ziamli» i
takoje abychodžańnie ź imi, maŭlaŭ, «nie tolki dziaržaŭnaja palityka, ale i chryścijanski, čałaviečy padychod samich biełarusaŭ».
Paśla taho Ministerstva pieravodzić strełki na Polšču, dzie, maŭlaŭ, «tolki ŭ biahučym hodzie zafiksavana kala 30 aktaŭ vandalizmu ŭ dačynieńni da pomnikaŭ ludziam, jakija addali svaje žyćci za jaje vyzvaleńnie ad fašyzmu». I ŭvohule za apošnija 25 hadoŭ u Polščy byŭ 561 saviecki pomnik, a ciapier ich zastałosia mienš za 100.
U suviazi z hetym MZS «zaklikaje polski bok da pavažlivych adnosin da našych zakonaŭ, u tym liku ŭ takich adčuvalnych pytańniach, jak zachavańnie histaryčnaj pamiaci». I nahadvaje pra toje, što na takija režymy, jaki ciapier ustalavaŭsia ŭ Biełarusi, niejak uździejničać bieśpierśpiektyŭna.