Hienštab Ukrainy: Biełaruś addała aeradrom u Ziabraŭcy pad kantrol rasijan
Pra poŭny kantrol rasijskich vojskaŭ nad aeradromam «Ziabraŭka» pad Homielem zajaviŭ namieśnik načalnika hałoŭnaha apieratyŭnaha ŭpraŭleńnia Hienieralnaha štaba Uzbrojenych siłaŭ Ukrainy bryhadny hienierał Alaksiej Hromaŭ padčas bryfinhu ŭ miedyjacentry Ukraina-Ukrinform 7 lipienia 2022 hoda.
Aeradrom «Ziabraŭka» z vyšyni
«Aeradrom» Ziabraŭka» ŭ Biełarusi ŭžo całkam kantralujecca rasijanami. Ciapier tam budujecca rasijskaja vajskovaja baza. Na terytoryi aeradroma znachodzicca rakietny dyvizijon rakietnaha kompleksa «Iskander-M» i dyvizijon S-400», — skazaŭ Hromaŭ.
Akramia taho, pa jahonych źviestkach, pad Minskam rychtujucca prymać kompleksy S-400 z Rasii, a ciaham nastupnaha miesiaca płanujecca adpravić vajskoŭcaŭ ź Biełarusi ŭ Rasiju na navučańnie.
Ale ŭ toj ža čas Alaksiej Hromaŭ padkreśliŭ, što vierahodnaść ustupleńnia Uzbrojenych siłaŭ Biełarusi ŭ vajnu z Ukrainaj zastajecca nizkaj.
Pa słovach Hromava, prykmiet farmavańnia nastupalnych hrupovak na terytoryi Biełarusi pakul niama, ale ŭ krainie nibyta aktyŭna viarbujuć byłych vajskoŭcaŭ u pryvatnuju vajskovuju kampaniju «Liha» (novaja nazva PVK Vahniera). U pieršuju čarhu havorka idzie pra vajskoŭcach sa śpiecyjalnych padraździaleńniaŭ i lotčykaŭ.