Abvinavačańnie zaprasiła dla babrujskich «terarystaŭ» vializnyja terminy źniavoleńnia
U sudzie Babrujskaha rajona i Babrujska praciahvajecca sud nad hrupaj miascovych «terarystaŭ». Pa spravie prachodziać Ihar Kazłoŭ, Kanstancin Jermałovič, Vital Minkievič, Natalla Kied i Nadzieja Polkina. I siońnia prakuror zaprasiŭ dla ich terminy źniavoleńnia, paviedamlaje «Viasna».
Troch mužčyn i dźviuch žančyn abvinavačavajuć pa niekalkich artykułach: stvareńnie arhanizacyi dla ažyćciaŭleńnia terarystyčnaj dziejnaści abo ŭdzieł u joj (č. 2 art. 290-4 KK), akt teraryzmu (č.2 art. 289 KK), pahroza ździajśnieńnia akta teraryzmu; (č.2 art. 290 KK), abraza Łukašenki (č.1 art. 368 KK).
Siońnia abvinavačańnie zaprasiła dla «terarystaŭ»-mužčyn vializnyja terminy źniavoleńnia. Tak, pa infarmacyi telehram-kanała «Bobrujsk Online», dla Kanstancina Jermałoviča prosiać 17 hadoŭ pazbaŭleńnia voli, Vitala Mankieviča — 16 hadoŭ, Ihara Kazłova —15 hadoŭ. Dla žančyn terminy prosiacca našmat mienšyja: dla Nadziei Polkinaj — 2 hady kałonii, a dla Natalli Kied — 2 hady «chatniaj» chimii.
Abviaščeńnie prysudu adbudziecca zaŭtra ŭ 10.00 u sudzie pa vulicy Kastryčnickaj, 128. Pasiadžeńnie budzie adkrytym.
