Biełaruski hajun: U siaredzinie lutaha ŭ Biełarusi źjaviŭsia znak biady, značeńnia jakoha nie zrazumieli
Telehram-kanał «Biełaruski hajun», zhadvajučy pra adnu sa starych publikacyj i supastaviŭšy jaje z novymi źviestkami, pryjšoŭ da vysnovy, što jašče da pačatku vajny byŭ adzin tryvožny sihnał, jaki śviedčyŭ pra toje, što nieŭzabavie pačniecca vajna, ale hetaha tady jašče nichto nie razumieŭ.
10 sakavika 2022 hoda, na 14-y dzień vajny, u kanale Antona Matolki byŭ apublikavany materyjał, dzie ŭpieršyniu było raskazana, što kala Nacyjanalnaha aeraporta «Minsk» moža znachodzicca kamandny centr biełaruskaj hrupoŭki Uzbrojenych siłaŭ Rasii — tak zvanaja «Placoŭka 400. Kupał». U tym ža materyjale aŭtary źviarnuli ŭvahu, što na hetaj terytoryi jak minimum z pačatku sakavika pracavała sistema radyjoelektronnaj baraćby (REB), jakaja vyklikała mocnyja pieraškody navihacyjnych sistem GPS/GLONASS. Nie vyklučana, što srodki REB słužyli dla prykryćcia/abarony kamandnaha punkta.
Akazałasia, što akramia Matolki na heta źviarnuŭ uvahu i karystalnik tvitara John Wiseman, jaki ŭvieś hety čas nie tolki naziraŭ za GPS-pieraškodami va ŭsim śviecie, ale i zachoŭvaŭ infarmacyju pra ich, vypuściŭšy dniami sajt z histaryčnymi źviestkami pa takich pieraškodach.
Zychodziačy z hetych źviestak atrymlivajecca, što REB na terytoryi Kupała pačała pracavać jak minimum z 15 lutaha 2022 hoda, a spynienaja adrazu paśla pačatku adstupleńnia US RF z Kijeŭskaha kirunku.
Heta značyć, robiać vysnovu aŭtary, što GPS-pieraškody pad Minskam jašče da pačatku ŭvarvańnia byli vielmi tryvožnym sihnałam, ale hetaha tady jašče nichto nie razumieŭ.
