Pradaje telefon, vystupaje na rasijskich turnirach. Čym žyvuć najbolš prykmietnyja spartsmieny — prychilniki Łukašenki
Dniami stała viadoma, što lehkaatlet Maksim Niedasiekaŭ, viadomy svajoj praŭładnaj pazicyjaj, naviedaŭ Litvu. Bronzavaha miedalista Tokia nie źbiantežyła toje, što biełaruskija ŭłady znachodziacca ŭ kanfrantacyi ź Litvoj. «Naša Niva» pahladzieła, čym jašče žyvuć spartsmieny, jakija padtrymlivajuć Łukašenku i pazbaŭlenyja mižnarodnych startaŭ praz saŭdzieł Biełarusi ŭ vajnie va Ukrainie.
Maksim Niedasiekaŭ. Fota: AR
Maksim Niedasiekaŭ: padarožničaŭ u Jeŭropu i traŭmavaŭsia na čempijanacie krainy
Na navinu pra svoj vizit u Litvu Niedasiekaŭ adreahavaŭ videa ŭ storys, zapisanym z domu, a taksama prademanstravaŭ u storys novuju ekipiroŭku ad brenda Puma. Cikava, što kampanija pieradała spartsmienu ekipiroŭku, nie chvalujučysia, što supracoŭničaje z praŭładnym atletam krainy, jakaja saŭdzielničaje ŭ vajnie va Ukrainie.
Biełaruskija atlety zaraz zabanienyja na mižnarodnych turnirach, i skakun u vyšyniu Maksim Niedasiekaŭ — nie vyklučeńnie. Tak što adnym z najvialikšych spabornictvaŭ, na jakich jon zaraz moža prajavić siabie, staŭ čempijanat Biełarusi pa lohkaj atletycy, što prajšoŭ z 16 pa 18 žniŭnia na stadyjonie «Dynama». Tam Niedasiekaŭ pieraadoleŭ vyšyniu ŭ 2,24 mietra i ŭziaŭ srebra turnira, a taksama atrymaŭ traŭmu — padviarnuŭ halenastop. Lepšy ž vynik Niedasiekava za siezon na dadzieny momant — 2,28 mietra.
Skakun prapuściŭ niekalki etapaŭ Biełaruskaj lehkaatletyčnaj lihi, stvoranaj śpiecyjalna dla taho, kab choć niejak kampiensavać zabanienym atletam adsutnaść mižnarodnych startaŭ, zatoje nie zdoleŭ prajści mima praŭładnych aktyŭnaściej. Tak, 1 červienia Niedasiekaŭ u kampanii inšych padpisantaŭ praŭładnaha lista spartsmienaŭ naviedaŭ dziciačy vajenna-patryjatyčny kłub «Ryś», stvorany na bazie vajskovaj čaści 3214 u minskim Uruččy. Hetaje padraździaleńnie viadomaje svaim udziełam u razhromie mirnych pratestaŭ.
Što da ŭviadzieńnia spartovaha banu, na jaho Niedasiekaŭ reahavaŭ imknieńniem da sumiesnych spabornictvaŭ z rasijskimi spartsmienami zamiest mižnarodnych turniraŭ: «Vystupy z rasijskimi spartsmienami pa ŭzroŭni buduć nie horšyja za jeŭrapiejskija ci suśvietnyja spabornictvy. Płanujecca stvaryć niešta na ŭzroŭni bryljantavych lih (mižnarodnaja sieryja lehkaatletyčnych turniraŭ. — «NN») pa toj ža pracoŭnaj płacie. Važna zacikavić spartsmienaŭ.
My ŭsio roŭna rychtujemsia da leta. Ja na 95% upeŭnieny, što spabornictvy buduć pravodzicca sumiesna z Rasijaj. MAK zabaraniŭ [spartsmienam ź inšych krain] vystupać u Rasii. Na mižnarodnych spabornictvach Rasii i Biełarusi zabaroniena vystupać. Čamu my pavinny słuchać Mižnarodny alimpijski kamitet? Tut patrebna skančvać pracu ź imi i spaborničać u ramkach SND».
Nastaśsia Mirončyk-Ivanova: vieryć u źniaćcie spartovych sankcyj
Jak i Niedasiekaŭ, hetaja skakucha ŭ pačatku leta naviedvała vajennuju čaść 3214 i «Ryś». Nastaśsi kampanija siłavikoŭ daspadoby: naprykład, Mirončyk-Ivanova vystaviła ŭ storys fota, dzie na čempijanacie krainy jaje padtrymlivajuć usio tyja ž śpiecnazaŭcy z Uručča.
Na turniry, darečy, skakucha ŭziała zołata. Ale ž jaje vynik pry hetym nie nadta ŭražvalny — 6,40 mietra, što źjaŭlajecca 134-m vynikam u śviecie ŭ hetym siezonie.
Tym nie mienš, Mirončyk-Ivanova vieryć u chutkaje źniaćcie sankcyj i aburajecca praź ich najaŭnaść: «Ja i ŭsie spartsmieny, viadoma, adčuvajem pačućcio niespraviadlivaści, złość. Pakul nas nie vypuskajuć, ale ja dumaju i spadziajusia na toje, što heta ŭsio možna papravić. Što ŭsio vyrašycca, usio budzie dobra, nas usio-taki dapuściać i hetaja niespraviadlivaść abydzie nas bokam».
A pakul sankcyi ŭsio jašče dziejničajuć, Nastaśsia nie suprać pabavić čas na praŭładnych mierapryjemstvach. Naprykład, takich, jak vystup Alaksandra Łukašenki ŭ Pałacy Respubliki ŭ honar 3 Lipienia ci jak kulturna-spartovy fiestyval «Vytoki» ŭ Połacku.
U rešcie rešt, usio heta nie robić skakuchu zanadta zadavolenaj žyćciom. U poście, prymierkavanym da zakančeńnia lehkaatletyčnaha siezona, Mirončyk-Ivanova pryznałasia: «Prysutničaje pačućcio niedarealizavanaści, bo ja b zrabiła jašče paračku startaŭ, enierhii jašče b chapiła na skački, i pačućcio viny pierad amatarami, što nie pakazała dalokija mietry!»
Alaksiej Tałaj: jeździć pa akupavanych Rasijaj ziemlach i sustrakajecca ź siłavikami
Žyćcio ŭ Alaksieja nasyčanaje. Jon aktyŭna ŭdzielničaje ŭ prapahandysckich pieradačach na dziaržtelebačańni, dzie vystupaje za toje, kab «siłavy błok vyčyściŭ našy krainy», i surjozna abmiarkoŭvaje fejkavuju infarmacyju — voś prykład.
Akramia hetaha, Tałaj u žniŭni paśpieŭ naviedać akupavany Krym, kudy zajechaŭ pa Krymskim moście — abjekt, darečy, jaho duža ŭraziŭ. Alaksieja nie pakinuła abyjakavym i sustreča z rasijskim kiraŭnikom Kryma Siarhiejem Aksionavym, jakuju atlet nazvaŭ «dobraj, važnaj i svoječasovaj».
Jašče ŭ žniŭni praŭładny atlet adznačyŭsia aryhinalnaj inicyjatyvaj: jon prapanavaŭ adnadumcam vykupić i pieravieźci na terytoryju Biełarusi i Rasii savieckija pomniki, jakija demantujuć u krainach Jeŭrasajuza. Tałaj ličyć, što kali takija pomniki zachavajucca, to «da ich budzie raka ŭsienarodnaha ŭšanoŭvańnia», a «vyratavanyja» pomniki «natchniać cełyja narody». Kali ž manumienty ŭ Jeŭropie ŭsio-taki buduć demantavanyja, pa mierkavańni Alaksieja, «jość vysokija ryzyki, što my pastavim novyja na tych ža miescach».
Adznačym, što Tałaju nie čužyja zaniatki dabračynnaściu — tak, jon naviedaŭ dziciačy chośpis u rasijskim Biełharadzie. Ale ž matyvavać ludziej jamu bolš cikava.
Z nadzvyčajnych padziej červienia ŭ Tałaja adznačym atrymańnie ŭznaharody ad AMAPu. Na sport Alaksiej taksama znajšoŭ čas: 6 lipienia jon vystupiŭ na adkrytym Kubku krainy pa płavańni siarod ludziej ź invalidnaściu, dzie ŭziaŭ zołata ŭ svajoj katehoryi.
Nastaśsia Prakapienka: spaborničaje z rasijanami i terminova pradaje hadžet
Hetaja piaciborka nabyła viadomaść paśla vybaraŭ-2020. Dzie jaje tolki nie zaŭvažali: Prakapienka znachodziła čas i na viełaprabieh z udziełam Viktara Łukašenki, i na praŭładny žanočy forum. Na im spartsmienka zapomniłasia aryhinalnym vystupam pra aficyjny biełaruski ściah, u historyju jakoha jana «vielmi dušeŭna kapnuła».
Zaraz piaciborka ŭžo nie tak časta ŭdzielničaje ŭ praŭładnych aktyŭnaściach, chacia i jana jeździła ŭ dziciačy vajenny kłub «Ryś» 1 červienia. Hetym letam Prakapienka sprabuje siabie na Kubku imia Ladniova — sumiesnym rasijska-biełaruskim turniry, stvoranym, kab choć niejak kampiensavać spartsmienam adsutnaść mižnarodnych spabornictvaŭ va ŭmovach sankcyj. Ź finała Kubka Ladniova Prakapienka pryviezła srebra.
A jašče praŭładnaja spartsmienka čamuści vyrašyła pradać telefon — miarkujučy pa emblemie na ŭpakoŭcy, jana mahła jaho atrymać na Alimpijskich hulniach.
Cikava, što hadžet doŭha lažaŭ u Nastaśsi, ale ŭ kancy červienia jana vyrašyła jaho terminova pradać, pa košcie našmat nižejšym, čym u mahazinach.
Jak i Mirončyk-Ivanova, Prakapienka nie prajšła mima fiestyvala «Vytoki», arhanizavanaha ŭ tym liku i Nacyjanalnym alimpijskim kamitetam pad kiraŭnictvam Viktara Łukašenki. Bronzavaja pryziorka Alimpijady-2008 pryjechała ŭ pačatku červienia na «Vytoki» ŭ Stolinie, dzie razdavała aŭtohrafy.
Dzinara Alimbiekava: źbirajecca zamuž i vystupaje na rasijskich Kubkach
Hetaja bijatłanistka i čempijonka Alimpijady-2018 ciapierašniaje leta zapomnić nadoŭha. U pačatku lipienia Dzinara atrymała prapanovu ruki i serca ad bijatłanista Antona Smolskaha, na jakuju adkazała zhodaj.
Alimbiekava i Smolski šmat času pravodziać razam: naprykład, kachanyja pajšli na vystup Alaksandra Łukašenki ŭ honar 3 Lipienia. Razam jany i trenirujucca, i spaborničajuć — zaraz, naprykład, Dzinara i Anton vystupajuć na etapie Kubka Sadružnaści ŭ Sočy, niezadoŭha da jaho kachanyja pierachvareli na kavid.
U minułym hodzie raman Smolskaha i Alimbiekavaj raskałoŭ žanočuju zbornuju pa bijatłonie, i zaraz padobna da taho, što situacyja nie palapšajecca. Naprykład, Hanna Soła, inšaja viadomaja biełaruskaja bijatłanistka, pryznałasia niadaŭna ŭ intervju, što dahetul nie kantaktuje ź Dzinaraj i ŭvohule nie žadaje hutaryć pra kalehu pa kamandzie.
Dzinara tym časam sumuje pa mižnarodnych turnirach: «Nam usim, viadoma, chočacca vystupać z najlepšymi ŭ śviecie, chacia i kankurencyja ŭ rasijskim bijatłonie davoli dobraja. Nam treba vystupać na mižnarodnych spabornictvach. Nie mahu skazać kankretna, kolki ja hatovaja ciarpieć».
«Naša Niva» — bastyjon biełaruščyny
PADTRYMAĆ«Azaronki — heta ahresiŭnaja mienšaść. A žyć my budziem u Biełarusi». Znakamity valejbalist vyvučaje psichałohiju i mnohaje pieraasensavaŭ
Hety bijatłanist — adzin ź lepšych u Biełarusi. Jaho historyja kachańnia raskałoła žanočuju zbornuju
Biełaruski mini-futbolny kłub paklikaŭ na jubilej nibyta rasijan, a nasamreč — drenna zamaskavanych «deeneraŭcaŭ»
