Abjadnany pierachodny kabiniet da 5 kastryčnika vyznačycca z płanami, prajektami i prapanovami
Abjadnany pierachodny kabiniet Biełarusi 22 vieraśnia vydaŭ pastanovu «Ab dziejańniach, nakiravanych na adnaŭleńnie niezaležnaści i suvierenitetu Respubliki Biełaruś». Hetaj pastanovaj da 5 kastryčnika ŭsie členy kabinieta, pryznačanyja ŭ jaho ŭ žniŭni, abaviazujucca vykanać peŭnyja kankretnyja dziejańni.
Pradstaŭnik pa zakonnaści i pravaparadku Alaksandr Azaraŭ musić da 5 kastryčnika pradstavić u Abjadnany pierachodny kabiniet Biełarusi dakład ab hatoŭnaści i terminach realizacyi płana mabilizacyi «Pieramoha».
Pradstaŭnik pa abaronie i nacyjanalnaj biaśpiecy Valeryj Sachaščyk abaviazujecca ŭ hety ž termin pradstavić u Kabiniet płan arhanizacyjnaj, infarmacyjnaj i materyjalna-techničnaj padtrymki biełaruskich dobraachvotnikaŭ, u tym liku na terytoryi Ukrainy.
Pradstaŭnik pa tranzicie ŭłady Pavieł Łatuška pavinien «padrychtavać i nakiravać instrukcyi dziaržaŭnym słužačym, jakija zajavili ab hatoŭnaści padtrymać demakratyčnyja źmieny ŭ Biełarusi, dla nastupnaj realizacyi pry zapusku płana «Pieramoha», a taksama ŭnieści na razhlad i zaćviardžeńnie Kabinieta prajekt pałažeńnia ab prysvajeńni vajskovych i śpiecyjalnych zvańniaŭ Biełarusi».
Pradstaŭnik pa zamiežnych spravach Valeryj Kavaleŭski musić zrabić adrazu dźvie rečy: «pradstavić płan dziejańniaŭ pa zabieśpiačeńni praktyčnych krokaŭ mižnarodnaj supolnaści ŭ padtrymku namahańniaŭ Abjadnanaha Pierachodnaha Kabinieta Biełarusi pa abaronie niezaležnaści, terytaryjalnaj cełasnaści i adnaŭleńnia suvierenitetu Respubliki Biełaruś» i sumiesna z Paŭłam Łatuškam «padrychtavać prapanovy ab pierahladzie dahavorna-pravavoj bazy adnosinaŭ Respubliki Biełaruś z Rasijskaj Fiederacyjaj».
