Dzieviać dziaržaŭ NATA padtrymali členstva Ukrainy i zaklikali pavialičyć joj vajskovuju dapamohu
Prezidenty dzieviaci krain Paŭnočnaatłantyčnaha aljansu z Centralnaj i Uschodniaj Jeŭropy ŭ niadzielu apublikavali sumiesnuju zajavu, u jakoj asudzili anieksiju Rasijaj ukrainskich terytoryj i zaklikali NATA istotna pavialičyć vajskovuju dapamohu Ukrainie.
U zajavie zaznačajecca, što prezidenty vaśmi dziaržaŭ NATA byli ŭ Kijevie ŭžo padčas poŭnamaštabnaj vajny i «na svaje vočy ŭbačyli nastupstvy rasijskaj ahresii».
«My paćviardžajem našu padtrymku suvierenitetu i terytaryjalnaj cełasnaści Ukrainy. My nie pryznajem i nikoli nie pryznajem sprob Rasii anieksavać lubuju ŭkrainskuju terytoryju», — dadajuć jany.
Taksama lidary dziaržaŭ Centralna-Uschodniaj Jeŭropy vykazali ćviorduju padtrymku rašeńniu Bucharesckaha samitu NATA 2008 hoda adnosna budučaha členstva Ukrainy ŭ Aljansie.
«My padtrymlivajem Ukrainu ŭ jaje abaronie ad rasijskaha ŭvarvańnia, patrabujem ad Rasii nieadkładnaha vyvadu vojskaŭ z usich akupavanych terytoryj i zaklikajem usich členaŭ Aljansu istotna pavialičyć vajskovuju dapamohu Ukrainie. Usie, chto ŭčyniaje złačynstvy ahresii, pavinny być pryciahnuty da adkaznaści i paŭstać pierad sudom», — padahulniajecca ŭ zajavie.
Jaje padpisali prezident Čechii Miłaš Zieman, prezident Estonii Ałar Karys, prezident Łatvii Ehiłs Levits, prezident Litvy Hitanas Naŭsieda, prezident Paŭnočnaj Makiedonii Steva Piendaroŭski, prezident Čarnahoryi Miła Džukanavič, prezident Polščy Andžej Duda, prezident Rumynii Kłaŭs Jochanis i prezident Słavakii Zuzana Čaputava.
