Politico: Pasły ES uzhadnili vośmy pakiet sankcyj suprać Rasii sa stollu cen na naftu
Krainy ES dasiahnuli damoŭlenaści pa vośmym pakiecie sankcyj suprać Rasii, piša Politico sa spasyłkaj na svaje krynicy. Kančatkovyja padrabiaznaści ździełki pavinny być apublikavanyja siońnia.
U liku ŭzhodnienych mier — stol cen na rasijskuju naftu. Jak adznačaje vydańnie, dakładnaja cenavaja miaža pakul nie ŭstanoŭlenaja, ale heta moža być zroblena na praciahu najbližejšych tydniaŭ.
ES zrobić sastupki dla Malty, Hrecyi i Kipra, jakija byli suprać stoli cen na rasijskuju naftu, adznačaje Politico.
Taksama ŭ novy pakiet sankcyj, pavodle Politico, uvajšli abmiežavańni ŭ dačynieńni da staleliciejnaj pramysłovaści i abaronnaha siektara, piersanalnyja miery suprać tych, chto «dapamahaje prezidentu Pucinu ŭ vajennych dziejańniach», zabaronu hramadzianam ES zajmać kirujučyja pasady ŭ rasijskich dziaržkampanijach.
Kančatkova dakumient prymuć 5 kastryčnika.
Pakiet, jaki źjaŭlajecca vośmym užo suprać Maskvy, byŭ prapanavany prezidentam Jeŭrakamisii Ursułaj fon der Lajen paśla taho, jak rasijski prezident pryhraziŭ prymianić jadziernuju zbroju i mabilizavaŭ sotni tysiač reziervistaŭ.
Jeŭrasajuz u kancy maja ŭzhadniŭ šosty pakiet sankcyj, jaki praduhledžvaje zabaronu na impart 2/3 rasijskaj nafty i šerahu naftapraduktaŭ. Dziakujučy hetamu, ES płanuje da kanca hetaha hoda admovicca ad 90 pracentaŭ naftavaha impartu z Rasii.
U ES užo raspracoŭvajuć dziaviaty pakiet sankcyj suprać Rasii ŭ adkaz na praviadzieńnie refierendumaŭ ab dałučeńni da Rasii «DNR», «ŁNR», častak Chiersonskaj i Zaparožskaj abłaściej.
