Siłaviki praciahvajuć teraryzavać svajakoŭ biełaruskaha dobraachvotnika, jaki zahinuŭ va Ukrainie
U telehram-kanale siłavikoŭ źjaviłasia videa z zatrymanym bratam Vasila Parfiankova — bajca pałka imia Kastusia Kalinoŭskaha, jaki zahinuŭ u kancy červienia pad Lisičanskam.
Svajaka Parfiankova zatrymali i prymusili skazać na videa, što jon byŭ padpisany na «ekstremisckija» telehram-kanały, rabiŭ reposty, nie ŭchvalaŭ toje, što jaho brat vajavaŭ va Ukrainie.
Raniej užo byli zatrymanyja stryječny brat, siastra i mama Vasila Parfiankova.
U lipieni stali viadomyja abstaviny suda nad siastroj i mamaj Parfiankova. Ich raspaviała žycharka Minska, jakaja praviała na Akreścina 27 sutak.
«Sud nad imi prachodziŭ vielmi ciažka — my čuli, jak ich sudzili praz skajp. Pa ich pryjechali šeść ci vosiem čałaviek u poŭnym abmundziravańni, praviali vobšuk. Ich abvinavacili ŭ niepadparadkavańni supracoŭnikam milicyi i ŭ tym, što jany niby napali na tych, chto ich zatrymlivaŭ. Tam žančyny dosyć malusieńkija, maci Vasila ŭ šanoŭnym uzroście, joj, zdajecca, 67 hadoŭ, jak jany mahli napaści? Na sudzie jany płakali i havaryli, kab im nie «šyli» toje, čaho nie było nasamreč. Mama Vasila kazała, što hatovaja adsiedzieć, ale pa zasłuhach, a nie za heta…
Da ich stabilna prychodzili z vobšukami, jak ja zrazumieła, kožnyja paŭhoda. U nas va ŭsich kom u horle byŭ. Było składana słuchać hety sud, vielmi składana», — raspaviała žančyna.
Vasil Parfiankoŭ — były biełaruski palitviazień, udzielničaŭ u Płoščy-2010. Byŭ abvinavačany va ŭdziele ŭ masavych biesparadkach, asudžany na 4 hady pazbaŭleńnia voli, ale praź niekatory čas pamiłavany Łukašenkam. Źjechaŭ va Ukrainu. U 2014 hodzie vajavaŭ na Danbasie na baku ŭkraincaŭ, atrymaŭ hramadzianstva, słužyŭ u armii.
U kancy červienia Parfiankoŭ zahinuŭ. Jamu było 38 hadoŭ. Dzie jahonaje cieła, nieviadoma.
