«Małapiśmiennaja» žančyna vyjhrała sud u Biełahraprambanka i viarnuła svoj «biezadzyŭny» ŭkład
Sudom Dobrušskaha rajona razhledžana sprava pa isku da Biełahraprambanka ab pryznańni ździełki niesapraŭdnaj. Iścica, uzrost jakoj nie nazyvajecca, damahłasia viarnuć svoj układ, bo, jak ustanaviŭ sud, jana nie razumieła ŭmoŭ ździełki.
U zajavie iścica ŭkazała, što 2 žniŭnia 2021 hoda pamiž joj i AAT «Biełahraprambank» byŭ zaklučany dahavor terminovaha biezadzyŭnaha bankaŭskaha ŭkładu ŭ zamiežnaj valucie. Suma ŭkładu — 1 995 dalaraŭ ZŠA.
U suviazi z paharšeńniem materyjalnaha stanovišča ŭ sakaviku 2022 hoda žančyna źviarnułasia ŭ bank za ŭkładam. Adnak joj było admoŭlena. Žančyna śćviardžaje, što nie viedała, što nie maje prava na daterminovaje viartańnie ŭkładu.
«Pry zaklučeńni dahavora jana razumieła, što patrebnaść u hrašovych srodkach moža ŭ jaje ŭźniknuć u luby momant, i raźličvała, što pry zvarocie ŭ bank za viartańniem układu, jon budzie joj adrazu viernuty, u advarotnym vypadku, takaja ździełka joju nie była b zaklučana. Zvarot układu pa jaje patrabavańni zjaŭlaŭsia dla jaje istotnaj umovaj dahavora», — raspaviadaje pres-słužba Viarchoŭnaha suda.
Iścica paprasiła pryznać niesapraŭdnym dahavor terminovaha biezadzyŭnaha bankaŭskaha ŭkładu, bo jon byŭ zaklučany «pad upłyvam pamyłki adnosna pradmieta i ŭmoŭ ździełki, jakija majuć dla jaje jak układčyka istotnaje značeńnie».
Sudom było ŭstanoŭlena, što žančyna, znachodziačysia ŭ pažyłym uzroście, zjaŭlajučysia małapiśmiennaj, nie aryjentujučysia ŭ jurydyčnych aśpiektach ździełki, niapravilna ŭsprymajučy tyja ci inšyja jurydyčnyja paniaćci, mieła skažonaje ŭjaŭleńnie ab ździełcy, znachodziłasia pad upłyvam pamyłkovaha ŭjaŭleńnia ab istotnych dla dadzienaj ździełki abstavinach.
Sudom taksama ŭstanoŭlena, što iścicy nie było dakładna paviedamlena ab umovach dahavora, taksama jak joj nie było viadoma ab nastupstvach daterminovaha viartańnia ŭkładu — pry zaklučeńni dahavora ŭ banku joj nie rastłumačyli ŭsie ŭmovy, u tym liku i paradak viartańnia ŭkładu.
Sud Dobrušskaha rajona pastanaviŭ pryznać niesapraŭdnym dahavor terminovaha biezadzyŭnaha bankaŭskaha ŭkładu ŭ zamiežnaj valucie, zaklučany pamiž žančynaj i Biełahraprambankam.
Paśla apielacyi sudovaja kalehija Homielskaha abłasnoha suda pakinuła rašeńnie suda bieź źmieny.
